Shymkentte jemqorlyqtyń jolyn kesýge kómektesken 3 turǵyn marapattaldy

<p>Shymkentte jemqorlyqqa qarsy 100-den astam belsendiler jumys istep jatyr. Bul týraly sybaılas jemqorlyqqa qarsy is-qımyl agenttiginiń Shymkent qalasy boıynsha departamenti basshysynyń birinshi orynbasary Jandos Jumabaev málimdedi, dep habarlaıdy Kazinform.</p>

2020 jyly 9 adam sybaılas jemqorlyq quqyq buzýshylyqtarynyń jolyn kesýge yqpal etken. Al, 2021 jyly bul baǵytta 12 adam arnaıy marapat alsa, 2022 jyly 7 adamǵa syıaqy berilgen. Al, bıylǵy jyly 3 turǵyn arnaıy marapatqa ıe boldy.

«Sybaılas jemqorlyq kórinisterine tap bolǵan kez kelgen azamat departamentke júgine alady nemese CaII-ortalyqtyń 1424 nómiri boıynsha qońyraý shala alady. Sońǵy 4 jylda departamentpen sybaılas jemqorlyq quqyq buzýshylyqtarynyń jolyn kesýge yqpal etken 31 tulǵa kótermelenip, marapattaldy. Olardyń syıaqy mólsheri 6,2 mln. teńgeni qurady» - dedi Jandos Jumabaev.

Bıylǵy jyly belsendi azamattardy, qoǵamdyq birlestikterdi, jeke jáne kvazımemlekettik sektor sýbektilerin, sondaı-aq basqa da uıymdardy sybaılas jemqorlyqqa qarsy is-sharalarǵa erikti retinde tartý maqsatynda agenttikpen «Jemqorlyqqa qarsy volonterlik» jobasy qolǵa alyndy. Qazirgi tańda Shymkentte 100-den asa jemqorlyqqa qarsy belsendiler tirkelgen.

«Eriktiler «Qazposhta» kassalarynda júrgizýshi kýáligi úshin memlekettik baj boıynsha negizsiz tólem alý faktilerin anyqtady. Salyq kodeksiniń 615-babyna sáıkes júrgizýshi kýáligi úshin memlekettik baj mólsheri 1,25 AEK quraıdy. Kórsetilgen memlekettik bajdy tóleý úshin «Qazposhta» kassalarynda jeke tulǵalardan 200 teńge somasynda komıssııa ustalady. Alaıda, is júzinde kassırler kórsetiletin qyzmetti alýshylardan «Kaspi» jeke shotyna aýdarý jolymen 4850 teńge somasyn talap etken» - dedi Jandos Jumabaev.

Sondaı-aq, spıker bıylǵy jyly jalpy 117 qylmys tirkelgenin jetkizdi. Aldyńǵy qatarda quqyq qorǵaý salasy tur, munda 30 qylmys oryn alǵan. Al, bilim salasynda 28, áleýmettik baǵytta 17, jer baǵytynda 4, sportta 7 qylmys tirkelgen.