Shymkentte turǵyn úılerdiń jylytý maýsymyna daıyndyǵy tómen

<p>ASTANA. KAZINFORM &ndash; Ónerkásip jáne qurylys mınıstri Qanat Sharlapaev óńirlerde aldaǵy jylytý maýsymyna daıyndyq jumystary qalaı júrip jatqanyn baıandady.&nbsp;</p>

«Turǵyn úıler boıynsha daıyndyq jumystary 34 169 úı qamtylǵan, bul jospardyń 68%-yn quraıdy. Shymkent qalasynda turǵyn úılerdiń jylytý maýsymyna daıyndyǵynyń tómendigi baıqalady. Óńirlerde ınjenerlik ınfraqurylym boıynsha josparly jóndeý jumystary júrgizilýde», - dedi mınıstr Úkimettiń búgingi otyrysynda. 

Sonymen birge, bilim berý nysandarynyń daıyndyǵy 88%-dy quraıdy. Bes óńir jospardan qalys. Olar – Shyǵys Qazaqstan, Qaraǵandy, Pavlodar, Almaty, oblystary jáne Almaty qalasy.

Densaýlyq saqtaý obektileri boıynsha daıyndyq 87%-dy quraıdy. Tómen kórsetkishter Qaraǵandy, Almaty, Aqmola, oblystarynda jáne Shymkent, Almaty qalalarynda baıqalǵan.

«Respýblıka boıynsha 546 shaqyrym jylý jelilerinde jóndeý jumystary josparlanǵan. Búginge deıin onyń 354 shaqyrymy nemese 65%-y jóndeldi. Bes óńirde jelilerdi jóndeý boıynsha jospardyń 50%-dan kemi oryndaldy, onyń ishinde Shymkent qalasynda – 31%, Mańǵystaý oblysynda – 41%, Atyraý, Qostanaı jáne Abaı oblystarynda – 49%», - dedi Q. Sharlapaev.

Eske salsaq, buǵan deıin jylytý maýsymyna 8,6 mln tonna kómirge qajettilik bar ekenin jazǵan edik.