Shymkentte senimgerlik basqarýǵa berilgen memlekettik kásiporyn memleketke qaıtaryldy
2017 jyly Ońtústik Qazaqstan oblysy ákimdiginiń qaýlysymen «Ortalyq sý-sport kesheni» MKQK satyp alý quqyǵymen senimgerlik basqarýǵa berilgen bolatyn. Nysannyń naryqtyq quny 1 mlrd 213 mln 700 myń teńgeni qurady. Elektrondy saýda nátıjesinde jeńimpaz atanǵan «GRAND TRUST» JShS-men senimgerlik basqarý týraly kelisimshart jasaldy. Kelisimshartqa sáıkes, senimgerlik basqarýshy nysanǵa 500 mln teńge ınvestıtsııa salyp, salyqtyq mindettemelerin ýaqytyly oryndaýǵa tıis bolǵan.
Alaıda, Shymkent qalasy ákiminiń baspasóz qyzmeti taratqan aqparatqa súıensek, kelisimshart talaptary oryndalmaǵan.
- Basqarýshy kompanııanyń mindetterin adal oryndamaýy saldarynan búginde ǵımarat paıdalanýǵa jaramsyz kúıge tústi. Qabyrǵalary jarylǵan, keıbir eden jabyndary opyrylǵan. Aldyn ala tekserý barysynda keshenniń qaýipsizdik talaptaryna saı kelmeıtini jáne ony paıdalaný azamattardyń ómiri men densaýlyǵyna qaýip tóndiretini anyqtaldy, - delingen ákimdik aqparatynda.
«GRAND TRUST» JShS dırektory Sadyqov Aqnur Smaılulynyń basshylyǵymen senimgerlik basqarýshy kompanııa jyl saıyn jergilikti bıýdjetten qarjylandyrylyp otyrdy. 2018-2024 jyldar aralyǵynda ǵımaratty ustaý jáne sý sporty túrleri boıynsha sportshylardy daıarlaý úshin 1 mlrd 218 mln teńgeden astam qarajat bólingen. Sonymen qatar, 2021-2024 jyldar aralyǵynda memlekettik sporttyq tapsyrysty jan basyna qarjylandyrý aıasynda Ortalyq sý-sport kesheninde jumys istegen «Sý sporty túrleri ortalyǵy» JShS jalpy somasy 335 mıllıon teńge kóleminde qarajat alǵan.
- Kompanııanyń bıýdjetke salyqtyq mindettemeler boıynsha 111 mln teńgeden astam qaryzy jáne sot sheshimine sáıkes shamamen 179 mln teńge qaryzy bar. Osyǵan baılanysty Shymkent qalasy ákimdigi «GRAND TRUST» JShS-men jasalǵan senimgerlik basqarý kelisimshartyn buzý týraly talap aryz berdi. Aryzdy Shymkent qalasynyń mamandandyrylǵan aýdanaralyq soty qanaǵattandyrdy. Aıta ketý kerek, tekserýlerdiń qorytyndysy boıynsha barlyq materıaldar jaǵdaıdy taldaý jáne quqyqtyq baǵalaý úshin tıisti organdarǵa beriledi,-delingen Shymkent ákimdiginiń aqparatynda.
Bıyl «Ortalyq sý-sport keshenine» kúrdeli jóndeý júrgizý josparlanyp otyr.
Aıta keteıik, budan buryn Shymkentte sapasyz salynǵan 1,4 mln teńgeniń jol jabyny qaıta tóselgenin jazǵan bolatynbyz.