Shymkentte patrýldik polıtsııanyń rota komandırine qylmystyq is qozǵaldy

<p>ShYMKENT. KAZINFORM - Shymkenttegi patrýldik polıtsııa rotasynyń komandırine qatysty bopsalaý jáne deldal arqyly para alý faktisi boıynsha qala turǵyndarynyń aryzy negizinde Shymkent qalalyq polıtsııa departamentiniń ózindik qaýipsizdik basqarmasy qylmystyq is qozǵady.</p>

Shymkent qalasy polıtsııa departamentiniń baspasóz qyzmeti usynǵan aqparatqa súıensek, jınalǵan materıaldardyń qorytyndysy boıynsha kúdikti ustalyp, ýaqytsha ustaý ızolıatoryna qamaldy.

«Shymkent qalalyq polıtsııa departamentiniń basshylyǵy zańdy teris paıdalaný jáne antty buzýdyń kez kelgen kórinisterine qatań jaýapkershilik júkteıdi. Burynǵy sińirgen eńbegine qaramastan, kináli adam nysandy kıimniń ar-namysyna nuqsan keltiretin áreketteri úshin jaýapkershilikten qutylmaıdy» delingen aqparatta.

Eske sala keteıik, birqatar buqaralyq aqparat quraldarynda bul polıtsııa bastyǵynyń Azamat Aıymbetov ekeni habarlandy. 

Ol osydan eki jyl buryn basshysynyń qymbat zattar alýǵa májúrleıtinin, aqsha jymqyratynyn áleýmettik jelide jarııalap, Іshki ister mınıstrliginen shara qoldanýdy suraǵan edi. Osylaısha kópshilikke Shymkenttegi eń adal polıtseı degen atpen tanylǵan.