Shymkentte mas kúıdegi er adamdy uryp óltirdi degen jigit 8 jylǵa sottaldy
Kináli dep tanylǵan 20 jastaǵy jigit 8 jylǵa bas bostandyǵynan aıyryldy. Degenmen, sottalýshy da, jábirlenýshi tarap ta oqıǵa ornynda kámelet jasyna tolmaǵan 2 jasóspirimniń bolǵanyn jáne olardyń da jazalanýyn talap etip otyr.
Otyrar arnasynyń jazýynsha, Shymkentte masań kúıde bolǵan er adamdy uryp óltirgen jigitke qatysty sot úkimi shyqty. 2003 jyly týǵan sottalýshy azamat QR QK 106-baby 3-bóligi boıynsha kináli dep tanyldy.
«QK 106-babynyń 3-bóliginde kózdelgen qylmystyq quqyqbuzýshylyq jasaǵany úshin kináli dep tanylsyn, oǵan 8 jyl merzimde bas bostandyǵynan aıyrý jazasy taǵaıyndalsyn. Táýekelge jazasyn qylmystyq atqarý júıesiniń ortasha qaýipsizdik mekemelerinde óteý belgilensin», - dedi Shymkent qalasy qylmystyq ister jónindegi aýdanaralyq sotynyń sýdıasy Aınel Oraqbaeva.
Shýly oqıǵa bıyl 9 qyrkúıekte bolǵan. Mas kúıdegi Tolqyn Abdrahmanovtyń jas jigittermen eregesip, arty tóbeleske ulasqany beınejazbalarǵa túsip qalǵan. Marqumnyń jary, sapardan kelgen kúıeýi jigitterden tek sý suraǵanyn aıtady.
«Vıdeoda aıdan anyq kórinip tur barlyǵy. Bular 4 bala bolǵan, tórteýi urǵan, eki qyz bolǵan aldynda, eki qyz da qarap tur. Ne jedel járdem shaqyrmaǵan, ne kómekke umtylmaǵan. Barlyǵy birge bolǵan, bir-birin tanıdy. Qalǵan úsh jigit jazadan qutylyp otyr. Bári osyǵan sen jazańdy alsań, az ýaqyt alasyń, moıyndaı ber dep qorqytqan», – deıdi marqumnyń jary Altynaı Aıtqulova.
Kinásin moıyndaǵan 2003 jylǵy jigit sońǵy sózinde sýdıadan tóbeles kezinde bolǵan jasóspirimder de jazaǵa tartylýyn surady. Sózinshe, bettestirý kezinde urǵandaryn moıyndaǵan olar, keıinnen sózderinen taıqyp shyǵypty. Altynaı Aıtqulova kúıeýiniń ólimine tek bir adamnyń ǵana jazalanýyna kelispeıdi. Oqıǵa ornynda bolyp, jaryn soqqyǵa jyqqan kámeletke tolmaǵan jigitter de jazasyn alsyn deıdi ol.
«Sońyna deıin úmittenip keldik, barlyǵyn tartatyn shyǵar jazaǵa dep. Eń bolmasa buzaqylyqpen de qamalǵan joq. Maǵan bala-shaǵama materıaldyq shyǵyn tólesin. Asyraýshymnan aıyryldym, 5 balam qaldy, turatyn úı-jaıym joq. Qazir sotqa qatysý úshin jumysqa da shyǵa almaımyn. Asyraýshymnan aıyryldym, dalada qaldym. Balalarymdy qasyma alyp kelgim keledi. Eshqandaı adam 5 balamen kirgizbeıdi», – dedi marqumnyń áıeli.
Marqumnyń artynda 4 uly men 1 qyzy qaldy. Jary ózi kinálap otyrǵan jasóspirimderdiń tipti keshirim surap kelmegenin aıtyp, materıaldyq shyǵyn talap etip otyr. Sýdıa olarǵa qatysty 27 qazandaǵy Abaı aýdandyq polıtsııa basqarmasy tergeýshisi qaýlysynyń zańdylyǵyn tekserýdi aýdandyq prokýrorǵa tapsyryp, 1 aı ýaqyt berdi. Al 20 jastaǵy sottalýshy 8 jyl jaza merzimin ortasha qaýipsizdik mekemesinde óteıdi.
Aıta keteıik, sot úkimi zańdy kúshine engen joq.