Shymkentte qurylys materıaldary saýdasynda zańbuzýshylyqtar anyqtaldy

<p>ASTANA. KAZINFORM - Qazaqstan Respýblıkasy Saýda jáne ıntegratsııa mınıstrligi Tehnıkalyq retteý jáne metrologııa komıtetiniń Shymkent qalasy boıynsha departamenti júrgizgen jospardan tys tekserý barysynda, Shymkent qalasynyń qurylys dúkenderinde granıt, travertın ónimderine tehnıkalyq reglamenttiń talaptary saqtalmaǵany anyqtaldy.</p>

QR Saýda jáne ıntegratsııa mınıstrligi baspasóz qyzmetiniń habarlaýynsha, qala turǵynynyń ótinishi boıynsha «Kamennaıa Era» JShS-ne tıesili «Ceramo Stone Group» dúkenine jospardan tys tekserý júrgizildi. Tekserý nátıjesinde «Blak Diamond» jáne «Haf» markaly jyltyratylǵan granıt plıtalaryna sáıkestikti rastaýdyń otandyq organdary tarapynan sertıfıkattar bolmaǵany anyqtalǵan. Bul – «Qurylys materıaldary men buıymdarynyń qaýipsizdigi týraly» Tehnıkalyq reglamenttiń 4-qosymshasynyń 22-tarmaǵynyń talaptaryn buzý bolyp tabylady. Sonymen qatar, atalǵan ónimde memlekettik jáne resmı tilderde mindetti tańbalaý bolmaǵan. Bul óz kezeginde, Tehnıkalyq reglamenttiń 64, 65 jáne 66-tarmaqtaryn, sondaı-aq «Tehnıkalyq retteý týraly» QR Zańynyń 31-babynyń 2-tarmaǵyn buzylǵanyn aıqyndaıdy.

Nátıjesinde, Seriktestik QR Ákimshilik quqyq buzýshylyq týraly Kodeksiniń 415-baby 1-tarmaǵynyń 1-tarmaqshasy boıynsha ákimshilik jaýapkershilikke tartylyp, qysqartylǵan tártippen 572 260 teńge kóleminde aıyppul tóledi. Alaıda, osy dúkende, sol azamat qaıta shaǵymdanyp, taǵy da osyndaı buzýshylyqtar anyqtalyp, eki eselengen mólsherde (2,1 mln teńge) jańa aıyppul salyndy. Іs Shymkent qalasynyń mamandandyrylǵan aýdanaralyq ákimshilik sotyna jiberildi. Budan basqa, ónimdi tańbalaý jónindegi talaptardyń saqtalmaýyna baılanysty Shymkent qalasynyń baqylaý jáne qadaǵalaý jónindegi Bas memlekettik ınspektory zańbuzýshylyqtar joıylǵanǵa deıin ónimdi satýǵa tyıym salý týraly qaýly shyǵardy.

Sondaı-aq, osy departament «KK-Stone Group» JShS-ne de jeke tulǵanyń shaǵymy negizinde jospardan tys tekserý júrgizip, munda da sáıkestik sertıfıkattary men ónimdi tańbalaýdyń joqtyǵy anyqtaldy. Seriktestik ákimshilik quqyq buzýshylyq týraly kodekstiń 415-baby boıynsha ákimshilik jaýapkershilikke tartyldy jáne bıýdjetke 359 970 teńge kóleminde aıyppul tóledi. Sondaı-aq, ónimge qatysty anyqtalǵan buzýshylyqtar tolyq joıylǵanǵa deıin ony satýǵa ýaqytsha tyıym salyndy.

Osyǵan deıin Álemdik brendti zańsyz paıdalanǵan almatylyqqa 1,5 mln teńge aıyppul salynǵany týraly jazdyq.