Shymkentte qarttar úıinde tanysqan eki qarııa úılendi

<p>ShYMKENT. KAZINFORM &mdash; Shymkent qalasy № 10 arnaýly áleýmettik qyzmetter kórsetý ortalyǵynda qyzmet alýshy eki qarttyń kóńili jarasyp, bas qurdy. Qos ardagerdiń qýanyshyna oraı demeýshiler esebinen toı jasalyp, jaqsy tilekter aıtyldy.</p>

72 jastaǵy Raqymqul Begalyuly men 62 jastaǵy Naıla Muhammedqyzy osy qarttar úıinde tanysyp, bas qosqan.

Ekeýi de № 10 áleýmettik qyzmetter kórsetý ortalyǵyna 2023 jyldyń maýsym aıynda kelgen.

Jyl sońyna qaraı qos ardager úılený jóninde sheshim qabyldap, 23 qazanda zańdy nekege turǵan.

Foto: Shymkent ákimdigi

Búgin qoǵam belsendisi Samat Bekebaev demeýshilerdiń esebinen dúbirletip toıyn uıymdastyryp berdi.

Toıǵa qarttar úıiniń qyzmetkerleri, jubaılardyń zamandas-qurdastary qatysty.

Jumyspen qamtý jáne áleýmettik qorǵaý basqarmasynyń basshysy Janat Ótebaeva qýanysh ıelerin úılený toıymen quttyqtap, denine saýlyq tiledi.

Foto: Shymkent ákimdigi

— Baqytty bolýǵa nıet etken adamǵa ýaqyt kedergi emes ekenin ózderińiz taǵy bir ret dáleldedińizder. Kóńili jarasqan adam qandaı kezde de bir-birine súıeý. Sizderdi búgingi shattyq kúnmen quttyqtaı otyryp, osy toıǵa atsalysqan barsha janǵa alǵys aıtamyn, — dedi basqarma basshysy.

Aıta ketsek, qazirgi tańda № 10 arnaýly áleýmettik qyzmetter kórsetý ortalyǵynda 47 qyzmet alýshy bar. Onyń 15-i áıel, 32-si er adam.