Shymkentte ǵımarat opyrylyp, vıdeo túsirmek bolǵan jigit úıindi astynda qaldy

<p>Shymkentte fosforshylar saraıynyń úshinshi qabaty qulap, bir adam úıindi astynda qalyp ketti, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

Qazir tótenshe jaǵdaı qyzmetiniń mamandary men polıtseıler úıindi astynda qalǵan balany izdestirip jatyr.

Shymkent qalasy ákiminiń orynbasary Sársen Quranbektiń aıtýynsha, bala ǵımarat ishine vıdeo túsiremin dep kirgen bolýy múmkin.

«Jastar qazir tık-tok túsirýge qumar. Jaqynda ǵana „Jezdýha“ degen serıaldyń bir serııasy osynda túsirilgen eken. Klıpter túsirilgen. Bala eliktegish keledi. Sondaı bir maqsatpen kelgen bolsa kerek. Polıtsııa ár bes mınýt saıyn patrýldep júrgen. Degenmen, balanyń aty bala, bir qýystan ótip ketken bolýy múmkin»,-dedi ol.

Oqıǵa ornyna qala ákimi Ǵabıt Syzdyqbekov te keldi.

Qutqarýshylar úıindi astynan balany izdep jatyr.

Aıta keteıik, «Fosforshylar» saraıy jýyrda qala ákimdiginiń menshigine qaıtarylǵan bolatyn.