Shymkentte endi qoǵamdyq kólikterde jol aqysyn qolma-qol tóleýge bolmaıdy

<p>ASTANA. KAZINFORM - Shymkent ákiminiń tapsyrmasymen arnaıy qaýly ázirlenip, qoǵamdyq kólikte qolma-qol tólem túri joıyldy.</p>

Endi tólemdi tek elektrondy jolmen – kólik kartasy, QR kod, SMS, bank kartalary, arnaıy qosymshadan NFC jáne Apple pay, Google pay, Samsung pay arqyly ǵana jasaýǵa bolady. Bul týraly Otyrar.kz-ke qala ákimdigi habarlady.

«Buǵan deıin qoǵamdyq kólikte qolma-qol tólem túrin júrgizýshiniń ózi júrgizetindikten, kólik quralyn basqarýdan alshaqtaýǵa májbúr bolatyn. Bul jolaýshylardyń, jol qozǵalysynyń basqa da qatysýshylarynyń ómiri men densaýlyǵyna qaýip tóndiredi. Oǵan qosa, qoǵamdyq kólik júrgizýshisi men jolaýshylar arasynda jıi túsinispeýshilikter oryn alatyn. Jyl basynan beri qoǵamdyq kólik boıynsha túsken 6 myń aryz-shaǵymnyń 3 myńnan astamy júrgizýshilerge qatysty. Onyń ishinde, jolaýshylardy qolma- qol aqshamen tóleýge májbúrleý, qasaqana esikterdi ashpaý jaıttary tirkelgen», - delingen ákimdik málimetinde.

Budan bólek júrgizilgen taldaýǵa sáıkes avtobýstarda 97% tranzaktsııalar elektrondyq júıeleri arqyly (karta, QR-kod, SMS), al qalǵan 3%-y ǵana qolma-qol aqshamen tólengengeni anyqtalypty. Bul kórsetkish te jolaýshylar úshin elektrondy júıeniń tıimdi ekenin kórsetip otyr.

Engiziletin ózgeristerdiń nátıjesinde kóleńkeli aqsha aınalymy, qoǵamdyq kólikterdiń bekitilgen ýaqytynan keshigýi jáne jol-kólik oqıǵalar kórsetkishi aıtarlyqtaı tómendeıdi dep sendirdi qala ákimdigi.

Aıta ketsek, búgingi tańda megapolıste 80 turaqty marshrýtta kúndelikti 947 avtobýs jolaýshylardy tasymaldaıdy.