Shymkentte elektr qýatynyń jetispeýshiligi qalaı sheshiledi
«3-Energortalyq» AQ qalanyń shet aımaqtarǵa táýeldiligin joıýǵa jáne ońtústik óńirdegi energııa tapshylyǵyn sheshý úshin jylyna 550 MVt beretin jańa bý-gaz elektr stantsııasyn salýdy josparlap otyr. Onyń quny 467 mln AQSh dollaryna jetedi. Atalǵan jobany 2022-2026 jyldary iske asyrý josparlanǵan. Osylaısha qalaǵa elektr energııasynyń jetispeýshiligi máselesi tolyǵymen sheshimin tappaq», - jazylǵan qala ákimdiginiń resmı jaýabynda.
Shymkentte 365 kúnniń 300 kúni shýaqty, tıisinshe munda jańartylatyn energııaǵa zor áleýet bar.
Atap aıtqanda, 2019-2020 jyldary «Avelar solar tehnolodjı» JShQ óndirýshisi óz qarajatyna Aıkól turǵyn alabynda 20 MVt/saǵ qýaty bar kún sáýlesi elektr stantsııasyn saldy. Óndirilgen elektr qýaty qosalqy stantsııa arqyly qalaǵa berilýde.
2017 jyly «Sý resýrstary-Marketıng» kásiporny Aqbaı-Qarasý sý jınaǵyshynda jer qoınaýynyń energııasy qoldanylatyn geotermaldy sorǵy jabdyqtaryn ornatqan. Bul jobanyń quny 230 mln AQSh dollaryn quraǵan.
Nátıjesinde atalǵan nysanda elektr qýatyn paıdalaný shyǵyny 5 esege tómendedi nemese bir jylda 317 mln teńge qarajat únemdeldi. Sonymen birge, bul sý jınaǵyshta saǵatyna 200 kVt/saǵ elektr qýatyn óndiretin kún elektr batareıleri ornatylǵan. Óndirilgen elektr qýaty nysannyń ózine jumsalady.
«Al qaladaǵy káriz tazalaý qurylǵysynda saǵatyna 2 myń kılovatt elektr qýatyn óndiretin kishi sý elektr stansasy jumys istep tur. Oǵan qosa, gaz jáne elektr energııasyn óndirý maqsatynda saǵatyna 400 kılovatt elektr qýatyn óndiretin Bıogaz qondyrǵysy iske qosyldy. Nátıjesinde, elektr qýatyn tutyný kólemi 88% tómendedi jáne shaıyndy sýdy tazalaý qýaty táýligine 100-150 myń m3 deıin ósti. Munda bir jylda 67,3 mln teńge qarajat únemdelgen», - dep tolyqtyrdy ákimdik.
Buǵan deıin Shymkent qalasynyń ákimdigi turmystyq qaldyq polıgonyndaǵy qoqys órteý faktileri toqtatylǵanyn habarlaǵan edi.