Shymkentte dárigerlerdi urmaq bolǵan er adam qamaýǵa alyndy
Áleýmettik jelide jedel járdem qyzmetkerlerine shabýyl jasap, qol jumsamaq bolǵan er adamnyń vıdeosy tarady. Onda kúdiktini jedel járdem qyzmetkerleri kúshtep ustap turǵanyn kórýge bolady. Al, er adam kópshilikke baǵynbaı beıádep sózder aıtyp, tipti dárigerlerge kúsh qoldanbaq bolǵan.
Atalǵan oqıǵaǵa qatysty pikir bildirgen Shymkent qalasy polıtsııa departamentiniń baspasóz qyzmeti quqyq buzýshynyń ustalǵandyǵyn málimdedi.
«20 qyrkúıek kúni keshke Ál-Farabı aýdandyq polıtsııa basqarmasynyń 102 arnasyna qaladaǵy medıtsınalyq mekemelerdiń birinen shaqyrtý kelip tústi. Jedel járdemmen jetkizilgen naýqasqa alǵashqy medıtsınalyq kómek kórsetý kezinde medqyzmetkerlerge shabýyl jasaǵan. Quqyq buzýshy ustaldy. Saraptama taǵaıyndaldy, onyń qorytyndysy boıynsha QR-nyń zańnamasy aıasynda tıisti shara qabyldanady», - delingen vedomstvo usynǵan aqparatta.