Shymkentte burynǵy qalalyq turǵyn úı basqarmasy basshynyń orynbasary 9 jylǵa sottaldy

<p>ShYMKENT. KAZINFORM - Shymkent qalalyq qylmystyq ister jónindegi aýdanaralyq sotynda burynǵy qalalyq turǵyn úı basqarmasy basshynyń orynbasary men jeke kásipkerge qatysty qylmystyq is qaraldy.</p>

Sheneýnik Shymkent qalasynyń turǵyn úı basqarmasy basshynyń orynbasary bola tura, 2023 jyly kópqabatty turǵyn úılerdiń seısmıkalyq turaqtylyǵyna tehnıkalyq zertteý júrgizýge qatysty memlekettik satyp alý sharttary boıynsha oryndalmaǵan jumystardy jáne kópqabatty turǵyn úılerdiń jóndeý jumystaryna qatysty oryndalmaǵan jumystardy qabyldaǵan. Sodan bıýdjettiń jalpy 367 mln teńgeden astam aqshasyn sottalýshy jeke kásipkerdiń kómegimen jymqyrǵan.

Kásipker basqa tulǵalardyń atyna tirkelgen jáne tenderler boıynsha jeńimpaz bolǵan JShS-ter arqyly aqsha alǵan.

Al, sheneýik bolsa óziniń ata-anasynyń atyna tirkelgen monsha keshenin salyp, osy arqyly qylmystyq jolmen tapqan aqshany zańdastyrǵan.

Sottalýshylardyń kinási kýálerdiń jaýaptarymen, zattaı dáleldemelermen, jasyryn tergeý áreketterimen, stenogramma, sarapshylardyń jáne mamandardyń qorytyndylarymen jáne basqa da is boıynsha jınaqtalǵan qujattar jıyntyǵymen tolyq dáleldendi.

«Sot, sottalýshylardyń qylmystyq jaýapkershiligin jeńildetetin mán-jaılar retinde olardyń árqaısysynyń asyraýynda jasóspirim balalarynyń bolýyna nazar aýdardy. Sottalýshy sheneýnik QK-niń 189-baby 4-bóliginiń 2) tarmaǵymen, 218-baby 3-bóliginiń 1), 3) tarmaqtarymen kináli dep tanylyp, oǵan túpkilikti múlkin tárkilep, 9 jylǵa bas bostandyǵynan aıyrý jazasy taǵaıyndaldy. Kásipker QK-niń 28-baby 5-bóliginiń, 189-baby 4-bóliginiń 2) tarmaǵymen kináli dep tanylyp, oǵan 8 jyl merzimge bas bostandyǵynan aıyrý jazasyn taǵaıyndaldy. Sot úkimi zańdy kúshine engen joq» - delingen Shymkent qalalyq soty taratqan aqparatta.

Aıta keteıik, budan buryn Shymkentte jattyqtyrýshylar men ádiskerlerge biliktilik sanattary negizsiz berilgenin jazǵan bolatynbyz.