Shymkentte bıikten qulaǵan aǵash jumysshyny basyp qaldy: jumys berýshige sot úkimi shyqty

<p>Shymkentte qaýipsizdik qaǵıdalaryn saqtamaǵan qurylys fırmasynyń basshysy 2 jylǵa sottaldy, dep habarlaıdy <a href="https://kaz.inform.kz/" target="_blank" rel="noopener">Kazinform.&nbsp;</a></p>

Oqıǵa 2022 jyldyń 16 qazan kúni bolǵan. Bıikten qulaǵan qurylys materıaly 22 jastaǵy jigitti basyp qaldy. Jelide taraǵan vıdeodan qurylys aýmaǵynda úsh jumysshynyń turǵanyn kórýge bolady. Al tóbeden qulaǵan aǵash biriniń ústine túsken. Saldarynan «Turan 2» shaǵynaýdanyndaǵy qurylys alańynda jumys istep júrgen 22 jastaǵy jigit kóz jumdy. 

Shymkent qalasynyń qylmystyq ister jónindegi aýdanaralyq sotynda jumys berýshi JShS basshysyna qatysty qylmystyq is qaraldy.

Sottalýshy QK-niń 277-baby 2-bóligimen, ıaǵnı qurylys jumystaryn júrgizýdiń qaýipsizdik qaǵıdalaryn buzyp, abaısyzda adam ólimine ákep soqqan áreketi boıynsha kináli dep tanyldy. Sot úkimimen oǵan 2 jyl merzimge bas bostandyǵynan aıyrý jazasy taǵaıyndaldy.

«Sottalýshynyń jaýaptylyǵy men jazasyn jeńildetetin mán-jaılardyń jıyntyǵyn, aýyrlatatyn mán-jaılardyń joq ekenin, jábirlenýshi ókiliniń keshirgenin, bas bostandyǵynan aıyrmaıtyn jaza taǵaıyndaý týraly pikirin, sottalýshynyń buryn sotty bolmaǵanyn jáne ol jasaǵan qylmys ortasha sanattaǵy qylmystarǵa jatatyndyǵyn nazarǵa ala otyryp, shartty túrde sottaýdy taǵaıyndady. Budan bólek, 2 jyl merzimge qurylys salasynda jumys atqaratyn uıymdarda basshylyq qyzmet atqarý quqyǵynan aıyrý túrindegi qosymsha jaza taǵaıyndaldy. Sot úkimi zańdy kúshine engen joq», - delingen Shymkent qalasynyń qylmystyq ister jónindegi aýdanaralyq sotynyń baspasóz qyzmeti usynǵan aqparatta.