Shymkentte bıyl órt faktileri 50 paıyzǵa artqan

<p>ShYMKENT. KAZINFORM — Shymkentte jyl basynan beri 93 órt faktisi tirkelgen. Bul byltyrǵy jyldyń tıisti kezeńimen salystyrǵanda 50%-ǵa kóp. </p>

Kelgen shyǵyn 247 mln teńgeden asqan. Bul týraly qalalyq tótenshe jaǵdaılar departamenti memlekettik órt baqylaý basqarmasynyń bastyǵy Elmıra Erejepova brıfıngte aıtty. 

Spıkerdiń sózinshe, órtten basqa bıyl 289 janý faktisi tirkelip, ótken jylmen salystyrǵanda 10 paıyzǵa ósken. 

Bıyl bes aıda qalada orman jáne dala órti tirkelmegen. 

«Qala aýmaǵynda eki orman sharýashylyǵy ornalasqan. Bul — Túrkistan oblysyna qarasty Badam jáne Shymkentke qarasty Jasyl beldeý orman sharýashylyǵy. Eki ormannyń jer kólemi 4 myń gektardan asady. Órt qaýipsizdigi kezeńine daıyndyq barysyna kelsem, eki orman sharýashylyqtyń balansynda 3 negizgi órt sóndirý tehnıkasy, 14 beıimdelgen tehnıka, 279 órt sóndirý quraly men 6 motopompa bar. Departamenttiń oqý ortalyǵynda osy orman sharýashylyqtarynyń qyzmetkerleri oqýdan ótken. Al bizdiń departamentte bolýy múmkin orman dala órtterin sóndirýge joǵary ótimdi 13 tehnıka jáne jeke quramnan 84 adam daıyndyqtan ótken», -dedi Elmıra Erejepova.

Foto: Shymkent óńirlik kommýnıkatsııalar qyzmeti

Bıyl órt qaýipti kezeńge yqtımal tabıǵat órtterdi jer jyrtý jolymen oqshaýlaý maqsatynda jalpy uzyndyǵy 1110 shaqyrymdy quraıtyn jerde mıneraldy jolaqtardy jyrtý josparlanǵan.

Búgingi tańda respýblıkalyq mańyzy bar joldardyń janynda 117 ga jerde, orman sharýashylyqtarynda 200-deı shaqyrym mıneraldy jolaq jyrtylǵan.