Shymkentte alty adamdy qaǵyp ketken avtobýs júrgizýshisi 5 jylǵa sottaldy
Shymkentte qoǵamda úlken rezonans týdyrǵan qoǵamdyq kólik júrgizýshisine qatysty sot úkimi shyqty.
Oqıǵa osy jyldyń sáýir aıynda boldy. Jol jıegine toqtaǵan júrgizýshi qoǵamdyq kólikten túsken sátinde avtobýs ózdiginen qozǵalyp, jol boıyndaǵy alty jaıaý júrginshini qaǵyp ketken bolatyn. Saldarynan 5 adam qaza tapsa, bir turǵyn múgedek bolyp qaldy.
Kólik quralyn qaraýsyz qaldyrǵan 49 jastaǵy júrgizýshige qatysty Qazaqstan Respýblıkasy Qylmystyq kodeksiniń 345-baby «Abaısyzda eki nemese odan da kóp adamnyń ólimine ákep soqtyrǵan kólik quraldaryn basqaratyn adamdardyń jol júrisi nemese kólik quraldaryn paıdalaný erejelerin buzýy» boıynsha qylmystyq is qozǵalyp, aıyp taǵyldy.
Búgin ótken sot otyrysynda sottalýshynyń kinási dáleldenip, 5 jylǵa sottaldy. Sondaı-aq ol 7 jylǵa júrgizýshi kýáliginen aıyryldy.
Eske salaıyq, 8 sáýir kúni Báıterekov – Nazarbekov kósheleriniń qıylysynda júrgizýshiniń basqarýynsyz qalǵan avtobýs bóktermen tómen qaraı júrip ketip, qatty jyldamdyqpen 6 adamdy qaǵyp ketken bolatyn.
Atalǵan jol-kólik apaty týraly aıtqan jaýaptylar júrgizýshiniń qoǵamdyq kólikti qol tejegishine qoıýdy umytyp, ájethanaǵa ketkenin jetkizgen bolatyn.