Shymkentte 6 tilde erkin sóıleıtin polıglot polıtseı bar
Shymkent saqshylary arasynda memlekettik tilden bólek taǵy 5 tilde erkin sóıleıtin pogondy arý bar. Ol - týrısterge qyzmet kórsetý tobynyń ınspektory Dıana Esengeldıeva.
Jastaıynan shet tilderdi meńgerýge beıim bolǵan Dıana 2021 jyly «Til sheberi» respýblıkalyq baıqaýynyń jeńimpazy atanǵan. Polıtsııa kapıtany qazaq, orys, aǵylshyn, nemis, ózbek jáne túrikshe erkin sóıleıdi. Ana tilinen keıin nemis tilin erekshe jaqsy kóretinin aıtady.
Qazirgi tańda, ıspan tilin úırenýdi josparlap júr eken.
«Bizdiń bilim deńgeıimiz polıtsııanyń aınasy. Qala qonaqtary bizdiń sóıleý mádenıetimiz ben olarǵa degen iltıpatymyzǵa qarap, elimizdiń polıtsııasy týraly pikir qalyptastyrady. Sondyqtan, kómek suraı kelgen azamattarǵa qolymnan kelgenshe qyzmet kórsetemin», – deıdi Dıana Rýstamqyzy.
Al, hobbıi týraly saýalymyzǵa ovcharka ıtke degen mahabbatym erekshe dep jaýap berdi. Oǵan sebep, 8 jasynda kórgen «Komıssar Reks» fılmi eken. Búgin de Dıana sol fılmniń keıipkerindeı polıtsııa salasynda jumys isteıdi jáne dál sol kınodaǵydaı 3 ovcharka ıtti ósirgen. Bos ýaqytynda sol tóbetterine kóńil bólip, olardyń kútimimen aınalysqan. Pogondy arýdyń bul oqıǵasy armandardyń oryndalatynyna naǵyz dálel desek artyq aıtpaımyz.
«Itter maǵan qarbalas ómirden bir sát demalýǵa múmkindik beredi. Olardyń janynda ýaqyttyń qalaı ótkenin de baıqamaımyn. Esesine soǵan turarlyqtaı erkindikti, tynyshtyq pen meıirimdilikti sezinemin. Osy ýaqytqa deıin 3 ıt asyradym, úsheýi de sondaı aqyldy boldy. Olarǵa qyzmettik ıtter sııaqty buıryqqa baǵynýdy úırettim. Keıde, adamdar meni kınolog dep te oılap qalatyn», – deıdi, saqshy qyz.
Jedel qyzmetti jany súıetin polıtseı, jumys barysynda qıyndyqqa tap bolǵan azamattarǵa barynsha jyldam kómektesýge tyrysatynyn aıtady.
Máselen, kúni keshe uıaly telefonyn joǵaltyp alǵan Úndistan azamatyna 40 mınýt ishinde smartfonyn qaıtarýǵa sebepker bolǵan. Shahardaǵy medıtsınalyq akademııada oqıtyn sheteldik jigit, telefonyn joǵaltyp alǵanyn aıtyp polıtsııaǵa júgingen. Dıana Esengeldıeva shuǵyl áreket etip, janyndaǵy dostarynyń taksı qosymshasy arqyly júrgizýshige baılanysqa shyqqan.
Alǵashynda «eshqandaı telefon joq» dep qysqa qaıyrǵan er adam, tártip saqshysynyń eskertýinen keıin kólik ishin qarap, smartfondy jolaýshylar oryndyǵynyń astynan tapqanyn aıtyp qaıtaryp bergen. Óz kezeginde, shetel azamaty polıtseıge jyldam ári adal qyzmeti úshin shynaıy rızashylyǵyn bildirdi.