Shymkent zoobaǵyna Chehııadan 3 alpaka janýary jetkizildi

<p>ShYMKENT. KAZINFORM - Jańadan kelgen janýarlardyń esimderin jeli oqyrmandary tańdaıdy.</p>

Chehııadan jetkizilgen janýarlardyń ekeýi analyq, bireýi atalyq. Olardyń barlyǵy 2022 jyly týǵan. Zoobaq mamandardyń aıtýynsha, alpaka lama janýaryna uqsas keledi. Negizinde, túıe tuqymdasyna jatady. Alpakanyń túgi óte tózimdi jáne maısyz, sondyqtan odan jasalǵan buıymdar uzaq ýaqyt boıy lastanbaıdy. Qazir úsh alpakanyń da jaǵdaıy qalypty. Endi zoobaq qyzmetkerleri jańadan kelgen janýarlarǵa laqap at bermek. Ony Instagram jelisindegi oqyrmandar usynǵan esimderdiń ishinen tańdap alýdy jón sanap otyr.

«Bizdiń zoosaıabaǵymyz jańa janýarmen tolyqty. Áli kúnge deıin alpakalardyń laqap attary joq. Dostar, biz sizderden osy súıkimdi janýarlarymyzǵa laqap at berýlerińizdi suraımyz. Ol úshin kommentarıge óz nusqalaryńyzben usynystaryńyzdy jaza ketińizder. «Tuıaqtylar» bóliminiń qyzmetkerleri eń jaqsy laqap atty tańdap alatyn bolady», - delingen jazbada.

Atalǵan jazbaǵa oqyrmandar kóptegen usynystar aıtyp jatyr. Olardyń arasynda «Aqmamyq, Qarashash, Qońyrtaı», «Torsyq, Mamyq jáne Bota», «Blek, Snoý ı Braýnı» jáne taǵy basqa da esimder bar.

Aıta keteıik, jýyrda Shymkent zoobaǵynda «GGG, Kanelo, Shakıra» atty 3 abdan dúnıege keldi.

Olardyń da esimderin jeli oqyrmandary tańdaǵan bolatyn.