Shymkent-Qytaı kásipkerleri B2B formatynda kelissózder júrgizdi
Shymkent qalasy ákimi baspasóz qyzmetiniń habarlaýynsha, sondaı-aq, Shymkenttiń 20-ǵa jýyq kompanııasy men Qytaıdyń 30-dan astam kásiporyn ókilderi arasynda B2B-kezdesýler ótti.
Shymkent bıznes-delegatsııasynyń quramyna densaýlyq saqtaý, IT, elektr jabdyqtaryn óndirý, qurylys materıaldary, metallýrgııa, tamaq jáne aýyl sharýashylyǵy ónimderin óndirý, bilim berý, qoǵamdyq tamaqtaný jáne t. b. salalardaǵy bıznes ókilderi qatysýda.
Qala ákimi Ǵabıt Syzdyqbekov qatysýshylardy quttyqtap, eki eldiń ekonomıkalyq yntymaqtastyǵy men iskerlik seriktestiginiń oń dınamıkalyq ósýin atap ótti.
«Búgingi kezdesýler syndarly yntymaqtastyqqa yqpal etip, ekijaqty jańa jobalardy iske asyrý perspektıvalaryna jol ashatynyna senimdimin. Sıan «Bir beldeý-bir jol» bastamasynyń Jibek joly Ekonomıkalyq beldeýiniń mańyzdy núktesi bolyp tabylady. Ótken jylǵy sapar aıasynda Qazaqstan Prezıdenti Qasym-Jomart Toqaev pen QHR Tóraǵasy Sı Tszınpın Shymkent pen Sıan arasynda baýyrlastyq baılanys ornatý týraly kelisimder boıynsha birqatar qujatqa qol qoıdy. Bul sharalar eki qala arasyndaǵy saýda-ekonomıkalyq qatynastardy jandandyratyny sózsiz», - dedi Ǵ.Syzdyqbekov.
Sondaı – aq, ol Shymkent - halyq sany boıynsha Qazaqstannyń úshinshi iri qalasy jáne alyp jatqan aýdany boıynsha birinshi qala ekenin atap ótti. Qala Ortalyq Azııa jáne Taıaý Shyǵys elderimen belgilengen ekonomıkalyq baılanystary bar shekara mańy aımaǵy mártebesine ıe jáne eldiń mańyzdy kólik toraby bolyp tabylady. Munda eldiń ónerkásiptik áleýeti shoǵyrlanǵan.
«Qalada ınvestorlar úshin barlyq jaǵdaı jasalǵan, jalpy aýdany 869 ga 5 óndiristik alań jumys isteıdi. Budan basqa, metallýrgııa, jeńil jáne tamaq ónerkásibin, munaı hımııasyn, logıstıkany damytý úshin óńdeý ónerkásibinde 2 098 ga aýmaqta 7 qosymsha óndiristik alań qurý boıynsha jumystar júrgizilýde»,-dedi ol.
Ǵabıt Syzdyqbekov qala ákimdigi Shymkent qalasynda saýda qatynastaryn ornatý jáne ınvestıtsııalyq jobalardy tabysty iske asyrý úshin barlyq qajetti qoldaýdy kórsetetinin atap ótti.
Sonymen qatar, kelissózder barysynda eki eldiń kásipkerleri óz kompanııalaryn tanystyrdy. Qytaılyq seriktester azyq-túlik óndirisi, logıstıka, mashına jasaý, densaýlyq saqtaý jáne medıtsına salalaryndaǵy yntymaqtastyqty damytýǵa qyzyǵýshylyq tanytty.
Óz kezeginde shymkenttik kásipkerler metallýrgııa, logıstıka, tsellıýloza - qaǵaz jáne tamaq ónerkásibi, mashına jasaý salalarynda iskerlik áriptestikti arttyrý múmkindikterin jetkizdi.
Forým men kezdesýlerdiń qorytyndysy boıynsha B2B formatynda memorandýmdar men sharttarǵa qol qoıyldy.
Atap aıtqanda, «Invest Shymkent» JShS men «China-Kazakhstan Enterprises Alliance Committee group» arasynda «KazFerroGroup» JShS men «Shanxi Heynan New Metallurgical Equipment Co.» JShS arasynda ózara túsinistik týraly Memorandýmǵa qol qoıyldy. «LTP - JT food Expert» JShS men «Xi ' an gang Tong Tian Xia Dian zi Shang Wu You Xian Gong Si» arasynda-qoǵamdyq tamaqtaný salasynda birlesken kásiporyn qurý týraly, sondaı-aq «KazBioTech» JShS men «Alashankou city Haoyu Trading Co. Ltd» - ósimdik maıyn jetkizýge arnalǵan kelisimshart jasaldy.