Fosforshylar saraıynda úıindi astynda qalǵan adamnyń denesi tabyldy

<p>Shymkenttegi Fosforshylar saraıynda úıindi astynda qalǵan jas jigittiń denesi tabyldy, dep habarlaıdy <a href="https://kaz.inform.kz/" target="_blank" rel="noopener">Kazinform</a>.&nbsp;</p>

Qaıǵyly habardy shahar basshysy Ǵabıt Syzdyqbekov Instagram paraqshasynda jetkizdi.

«Ókinishke qaraı, búgin Fosforshylar saraıynda qaıǵyly oqıǵa boldy. Birneshe stýdent saraıǵa kirgen. Aldyn ala aqparat boıynsha, jigitterdiń biri ekinshi qabatqa kóterilgen. Onda ishki qurylymnyń bir bóligi qulap, úıindi astynda qalǵan. Arnaıy tehnıkanyń kómegi jáne qutqarýshylardyń kúshimen jas jigittiń denesi úıindi astynan shyǵaryldy. Marqumnyń otbasyna kóńil aıtamyn» deıdi ákim.

Oqıǵa bolǵanǵa deıin ǵımarattyń aınalasynda eskertý taspalary tartylyp, polıtsııa patrýli jaqyn jerde kezekshilik etken.

Bul sharalardyń bári apattyń aldyn alý maqsatynda jasalǵan.

Qazirgi kezde atalǵan ǵımarattyń aýmaǵynda polıtsııa ekıpajdarynan birneshe post qoıyldy.

«Osy oraıda ata-analardy bos turǵan obektilerge, sondaı-aq qurylys, qaıta qurý satysyndaǵy nysandarǵa barý qaýpi týraly balalarǵa durys keńes berýge shaqyramyn» deıdi Ǵabıt Syzdyqbekov.

Eske sala keteıik, Shymkentte fosforshylar saraıynyń úshinshi qabaty qulap, bir adam úıindi astynda qalǵanyn habarlaǵan edik.