Shildeden bastap «E-Úkimet» veb-portalynan 20 qyzmetti elektrondy qoltańbasyz alýǵa bolady
«Halyqqa qyzmettiń barynsha sapaly kórsetilýi azamattardyń memlekettik organdar jumysyna senimin arttyrýdyń birden-bir joly ekenin Elbasy únemi aıtyp keledi. Osyǵan saı memlekettik qyzmet kórsetý salasyn damytý isi jyl ótken saıyn keńeıe túsýde. Bul jumystar ásirese ótken jyly Memleket basshysynyń tapsyrmasy boıynsha «Azamattarǵa arnalǵan Úkimet» memlekettik korporatsııasy qurylǵannan keıin aıryqsha qarqyn aldy dep aıtýǵa bolady. Osynyń arqasynda Halyqqa qyzmet kórsetetin barlyq ortalyq bir júıege toptasyp, qyzmetterdi bir jerden alýǵa múmkindik týdy», - dedi ol.
Mınıstrdiń dereginshe, búgingi kúni korporatsııa bazasyndaǵy 986 keńsede 21 myńǵa jýyq maman jyl saıyn halyqqa 40 mıllıonǵa jýyq memlekettik qyzmet kórsetedi. Ótken jyly mobıldi ortalyqtar kórsetken qyzmetter 500 myńǵa jýyqtasa, múmkindigi shekteýli tulǵalar 40 myńǵa jýyq qyzmetke qol jetkizdi. Arnaıy halyqqa qyzmet kórsetý ortalyqtary 1 mln. 200 myń qyzmet kórsetti.
«Osyndaı kórsetkishterdiń nátıjesinde halyqtyń memlekettik qyzmetke kóńiliniń tolýy 80 paıyzdan asty dep aıtýǵa bolady. Aqparat jáne kommýnıkatsııalar mınıstrligi búgingi kúni Úkimet josparynyń aıasynda qyzmetterdi kórsetýdiń tıimdiligin arttyrýda. Jańa tehnologııalardy engizý jáne qyzmet kórsetý aıasyn ulǵaıtý boıynsha kóptegen jumystar atqarýda. Solardyń ishinde bıylǵy jyly daıyn qujattardy úıge jetkizý, kórsetilgen qyzmet nátıjesi týraly SMS-habarlama joldaý, sonymen qatar múmkindigi shekteýli klıentter úshin onlaın-sýrdoaýdarma qyzmetteri iske qosyldy. Buǵan qosa sizdiń (Úkimet basshysy Baqytjan Sǵyntaev) tapsyrmańyzdyń aıasynda bıylǵy shildeden bastap elektrondy úkimettiń veb-portalynda elektrondy qoltańbasyz alýǵa bolatyn 20 qyzmet júzege asyrylady. Jalpy búgingi kúni memlekettik qyzmetterdiń tiziminde 723 qyzmet bolsa, sonyń 548-in memlekettik korporatsııa kórsetip otyr», - dedi Dáýren Abaev.