Shildede elektr energııasyn jańa tártipte satyp alý tetigi engiziledi

ASTANA. QazAqparat – Qazaqstanda elektr energııasyn ortalyqtandyrylǵan tártipte satyp alý jáne satý tetigi engiziledi. Bul týraly Energetıka vıtse-mınıstri Jandos Nurmaǵanbetov aıtty, dep habarlaıdy QazAqparat tilshisi.

«Saladaǵy qazirgi jaǵdaıdy, ıaǵnı elektr energııasynyń boljamdy tapshylyǵyn, energııa óndirýshi uıymdardyń ártúrli tarıfterine baılanysty básekelestiktiń teń emes jaǵdaılaryn, sondaı-aq generatsııanyń jańa kózderin, onyń ishinde JEK salý jónindegi josparlardy eskere otyryp, elektr energııasyn ortalyqtandyrylǵan tártipte satyp alý jáne satý modeli engiziledi», - dedi J. Nurmaǵambetov Ortalyq kommýnıkatsııalar qyzmetindegi baspasóz máslıhatynda.

Osy oraıda ol elektr energııasyn biryńǵaı satyp alýshy júıesi iske qosylatynyn aıtty. Bul turǵyda elektr energııasyn satyp alý jáne satý kezinde alypsatarlar operatsııalaryna jol bermeý, deldaldardy qysqartý eskerilgen.

Elektr energııasyn ortalyqtandyrylǵan tártipte satyp alý jáne satý modeli birqatar mindetti sheshýge arnalǵan. Bul rette eldiń energııalyq qaýipsizdigin qamtamasyz etý úshin dereý retteýdi talap etetin qadamdar eskerilgen.

Atap aıtqanda, bıyldyń 1 shildesinen bastap Biryńǵaı satyp alýshynyń modelin engizý josparlanyp otyr.

Budan buryn habarlanǵandaı, Qazaqstan aýmaǵyndaǵy 55 elektr stantsııasynyń tehnıkalyq jaǵdaıyna qatysty aýdıt júrgizildi.