Shilde aıynda iskerlik belsendilik ındeksi tómendededi

NUR-SULTAN. QazAqparat - 2021 jyldyń shilde aıyndaǵy iskerlik belsendilik ındeksi týraly QR UB Aqsha-kredıt saıasaty departamentiniń dırektory Jandos Shaımardanov túsinikteme berdi, dep habarlaıdy QazAqparat tilshisi.

«Baǵalaý nátıjesi boıynsha, iskerlik belsendilik ındeksi shildede 0,8 pýnktige tómendep, 50,8 (maýsymda – 51,6) boldy. Indekske qyzmet kórsetý sektoryndaǵy kórsetkishtiń 51,1-ge deıin (maýsymda – 52,7) tómendeýi áser etti, bul karantın shekteýlerine baılanysty iskerlik belsendiliktiń nasharlaýyna, jańa tapsyrystar sanynyń qysqarýyna jáne jetkizý merziminiń ulǵaıýyna baılanysty oryn aldy. Soǵan qaramastan, qurylystaǵy kórsetkish 50,1-ge deıin (maýsymda – 47,6) ulǵaıdy, al ónerkásipte 50,5 (maýsymda – 50,4) bolyp, is júzinde ózgergen joq», - dedi J. Shaımardanov.

Aımaqtar arasynda shildede 10 óńirde iskerlik belsendilik kórsetkishi jaqsaryp, 7 óńirde nasharlaǵany baıqaldy. Іskerlik belsendiliktiń joǵary deńgeıi Túrkistan (58,8) men Aqmola (57,8) oblystarynda, neǵurlym tómen deńgeıi – Shyǵys Qazaqstan oblysynda (40,8) kórinis tapty.

Bıylǵy shildede respondentter elde bıznes júrgizý jaǵdaılarynyń nasharlaǵanyn atap ótti. Qazirgi bıznes-jaǵdaılaryn baǵalaý jónindegi jaýaptar teńgerimi 0,5 (maýsymda – 4,7) boldy, bul Qazaqstandaǵy epıdemıologııalyq ahýaldyń nasharlaýy saldarynan shekteý sharalaryn qalpyna keltirýge baılanysty oryn aldy. Kásiporyndar ónimge/qyzmetke suranysty, kommýnıkatsııalarǵa jáne qarjyǵa/kredıtterge qoljetimdilikti oń baǵalady. Bıznesti qorǵaý máseleleri men salyq júktemesi teris baǵa aldy.