Shyǵys Qazaqstanda jyl saıyn 2500 adamnan qaterli isik anyqtalady

<p>Shyǵys Qazaqstan oblysynda jyl saıyn orta eseppen 2500 adamnan qaterli isik anyqtalyp jatyr, dep habarlaıdy <a href="https://kaz.inform.kz/" target="_blank" rel="noopener">Kazinform.&nbsp;</a></p>

Qaterli isik aýrýy boıynsha respýblıkalyq statıstıkada Shyǵys Qazaqstan kóp jyldar boıy aldyńǵy orynda keledi. Oblysta jyl saıyn orta eseppen 2500 jańa qaterli isik aýrýy anyqtalady. Bul týraly óńirdiń bas onkology Gúlmıra Saǵıdýllına málim etti.

«Búginde ShQO-da onkologııalyq esepte 13 878 naýqas tur. 2018 jyldan bastap elimizde onkologııalyq kómek «Qazaqstan Respýblıkasynda qaterli isikke qarsy kúrestiń 2018-2022 jyldarǵa arnalǵan keshendi josparyn» iske asyrý sheńberinde júzege asyryldy. Sonyń barysynda oblysta onkologııalyq aýrýlardan bolatyn ólim-jitim kórsetkishi 15,3 paıyzǵa tómendegen», - deıdi ol.

Bas onkologtyń aıtýynsha, naýqastardyń arasynda erlerge qaraǵanda áıelder kóp. Aýyrǵandar ishinde 60-70 jas aralyǵyndaǵy patsıentter jıi baıqalady.

«Endi qaterli isikke qarsy kúrestiń 2027 jylǵa deıingi keshendi jospary bekitildi. Tıimdiligi joǵary erte dıagnostıkalaý, mamandandyrylǵan emdeýdi damytý, pallıatıvtik kómek pen ońaltý, ǵylymı baǵyt pen kadrlardy damytý syndy baǵyttar boıynsha jumys júrgizilmek», - deıdi Gúlmıra Saǵıdýllına.