Shyǵys Qazaqstanda qazan aıynan beri jer úılerdegi pesh aqaýynan 8 órt shyqty
ShQO Tótenshe jaǵdaılar departamenti baspasóz qyzmetiniń málimetine súıensek, qutqarýshylar jer úılerdi aralaý kezinde órt qaýipsizdigi erejelerin buzýdyń 20 000-ǵa jýyq faktisin anyqtady.
«Jylytý maýsymy bastalǵaly peshten órt shyǵý jáne halyqtyń kómirtegi totyǵymen ýlaný jaǵdaılary kóbeıedi. Qazan aıynda Shyǵys Qazaqstanda jer úılerde barlyǵy 36 órt bolyp, 2 adam kóz jumdy. Sonyń ishinde peshtegi aqaý saldarynan 8 órt shyqqan», - delingen aqparatta.
TJD qyzmetkerleri kúzdiń basynan beri óńir boıynsha barlyǵy 68 461 jeke turǵyn úıdi aralady. Nátıjesinde, órt qaýipsizdigi erejelerin buzýdyń 19 236 faktisi anyqtaldy. Onyń ishinde peshke qatysty – 8507, elektr jelileri men jabdyqtar boıynsha – 7434.
"Qazirgi ýaqytta áleýmettik osal sanattaǵy otbasylar turatyn peshpen jylytylatyn úılerdi aralaýdyń ekinshi kezeńi júrgizilýde. 3 574 úıdiń 820-sy tekserildi. 137 úıde anyqtalǵan buzýshylyqtar áli joıylǵan joq, biraq 636 úıdiń ıeleri olqylyqtardyń ornyn tolyqtyrǵan" delingen habarlamada.