Shıelide Nartaıdyń murasyn nasıhattaýshy mádenıet qaıratkerin eske alý keshi ótti

ShIELІ. QazAqparat - Qyzylorda oblysynyń Shıeli aýdanynda belgili jyraý, Qazaqstan Respýblıkasynyń mádenıet qaıratkeri Qurmanbek Bekpeıisti eske alý keshi bolyp ótti, dep habarlaıdy QazAqparat tilshisi.

Atalmysh shara Tuńǵysh Prezıdent - Elbasy Nursultan Nazarbaevtyń «Bolashaqqa baǵdar: rýhanı jańǵyrý» baǵdarlamasy aıasynda uıymdastyryldy.

Qurmanbek Bekpeıis 1965 jyly Shıeli aýdanynda dúnıege kelgen. Jastaıynan án-jyrǵa áýestenip, qazyna artqan kerýen jyrdyń kóshin órge súıredi. Túrli terme, dastan, tolǵaý jazyp, ulttyq ónerdiń ulyqtalýyna ólsheýsiz úles qosqan. Oblystyq, respýblıkalyq, halyqaralyq jyrshy, termeshiler baıqaýynda birneshe dúrkin jeńimpaz atandy. Mádenıet maıtalmany retinde aýdandaǵy aıshyqty sharalarǵa uıytqy bolyp, «Nartaı» óner mektebi men «Jas dáýren» halyq án-bı ansambline jetekshilik etti.

Óner keshinde elimizge belgili aqyndar Iranǵaıyp Kúzenbaev, Meıirbek Sultanhan, Erjan Ámir jyraýǵa arnaý aıtty. Atalmysh shara barysynda oblystyq halyq shyǵarmashylyǵyn damytý jáne mádenı-prodıýserlik ortalyǵynyń qyzmetkeri, jyraý Maıra Sársenbaeva Qurmanbek Bekpeıis týraly estelikter aıtyp ótti.

Óner sharasynda Qurmanbek Bekpeıistiń sózine jazylǵan «Bir tal saban», «Saǵynyshym-sańlaǵym», «Botabaıymsyń», «Kóktem», «Kıeli Shıeli» ánderin aýdan ónerpazdary oryndady.

Sondaı-aq, Qyzylordada Ábdildá Tájibaev murajaıy jańa muraǵattarmen tolyǵady.