Shıeli aýdanynda aýa raıy qolaısyzdyǵynan mektepterdiń shatyry ushyp ketti

ShIELІ. QazAqparat - Qyzylorda oblysy Shıeli aýdanynda aýa raıy qolaısyzdyǵynan turǵyn úıler men áleýmettik nysandardyń shatyry ushyp ketti, dep habarlaıdy QazAqparat tilshisi.

Aýdanda aýa raıynyń qoalısyzdyǵy jáne qatty jeldiń áserinen birqatar eldi mekende elektr júıesinde aqaý boldy. Saldarynan elektr energııasymen qamtamasyz etý shektelýde.

«Tıisti sala mamandary tarapynan elektr baǵanasy men transformatorlar qalypqa keltirilýde. Sondaı-aq, atalǵan tabıǵı jaǵdaı saldarynan Báıgequm, Aqtoǵan aýyldyq okrýgindegi mektepterdiń, birqatar jeke sektordaǵy úılerdiń shatyry ushyp ketken», - dep málim etti aýdan ákimdiginen.

Vedomstvo málimetinshe, aýdan ákimdigi janynan osyǵan baılanysty jumysshy toby qurylyp, tıisti sharalar qabyldanýda. Oqıǵadan zardap shekkender joq.

Eske sadsaq, budan buryn Shıeli jáne Jańaqorǵan aýdandarynda kúshti jel ǵımarattardyń shatyryn ushyryp áketti.