Shıelenis joq - Astana ákimdigi Reseı azamattarynyń kelýi jaıynda

ASTANA. QazAqparat – Elordanyń Halyqqa qyzmet kórsetý ortalyqtaryna kún saıyn Reseıden kelgen 3 myńǵa jýyq azamattan ótinim túsip jatyr. Bul týraly Astana qalalyq máslıhaty Zańdylyq, quqyq tártibi jáne jurtshylyqpen jumys máseleleri jónindegi turaqty komıssııasynyń tóraǵasy Nurlan Kópeshov aıtty, dep habarlaıdy QazAqparat tilshisi.

«Qazirgi ýaqytta EAEO kelisimi aıasynda qajetti is-sharalar júrgizilip jatyr. Olardyń ishinde Reseı Federatsııasynan kelgen azamattar HQKO-larymyzǵa júgingenin atap ótýge bolady. Úlken júkteme boldy. Birinshi kúni kezek baıqaldy. Bir túnniń ishinde «Azamattarǵa arnalǵan Úkimetpen« birlesip, «Jastar» saraıy alańynda arnaıy HQKO uıymdastyrdyq, onda barlyq tereze arnaıy qyzmet kórsetedi. Kúnine 3 myńǵa jýyq adam keletinin baıqaımyz. Olardyń ótinimderiniń jartysy sol kúni, jartysy úsh kún ishinde sheshiledi. Reglamenttik merzim boıynsha qyzmet kórsetilip jatyr, ıaǵnı JSN tirkeledi», - dedi Nurlan Kópeshov elorda máslıhatynyń otyrysynda.

Onyń atap ótýinshe, qalada qaýipsizdik máseleleri qamtamasyz etilgen.

«Qazir basqa erekshe jaǵdaılar men shıelenister joq. Qonaq úı keshenderine, qonaqúılerge, páterlerge úlken júkteme bar ekenin kórip otyrmyz. Búgingi tańda janjaldar, basqa da jaǵdaılar tirkelgen joq. Jalpy, barlyq quqyq qorǵaý organdary kelgen azamattar men azamattarymyzdyń quqyqtyq tártibi men qaýipsizdigin qamtamasyz etýge baǵyttalǵan», - dedi ol.