Shıeli aýdany ákimin saılaýda kókparshylar daýys berdi

<p>Shıeli aýdanynda ótip jatqan ákim saılaýynda jergilikti kókparshylar komandasy №299 saılaý ýchaskesinde óz tańdaýyn jasady, dep habarlaıdy <a href="Kazinform" target="_blank" rel="noopener">Kazinform</a>.</p>

Shıeli aýdanynda barlyǵy 50402 saılaýshy tirkelgen. Onyń ishinde 694 jas alǵash ret daýys berýge qatysady.

Aýdan kóleminde 40 ýchaskelik komıssııanyń 388 múshesi jumys atqarady.

Shıeli aýdanyndaǵy №299 saılaý ýchaskesine kókparshylar da kelip, óz tańdaýyn jasady.
Saptama etik kıip, tobylǵy qamshy ustap ulttyq sportty nasıhattap júrgen jigitter saıası naýqanda birlik tanytyp, daýys berýge keldi.

«Búgin biz úshin - aıtýly kún. Sondyqtan aýyldaǵy kókparshylar jınalyp, birge daýys berdik. Saılaýǵa árkim jaýapkershilikpen qarap, el erteńi úshin daýys berýi tıis», - dedi kókparshy Jomart Sársenbekuly.

Aıta ketsek, Shıeli aýdanyna kandıdat retinde 3 azamat tirkelgen. Olardyń barlyǵy da joǵary bilimdi, memlekettik qyzmettiń túrli satysynan ótken.