Shettegi qazaq otbasynyń izgiligi: «Boran» fılmi prokatqa shyqty
Kórkem týyndy ómirde bolǵan oqıǵaǵa negizdelgen – ótken ǵasyrdyń 80-shi jyldary, keńes zamanynda jas jigit shuǵyl kórshi aýylǵa attanady. Borandy kúni adasyp ketken jas jigit Qytaı shekarasynan asyp ótkenin baıqamaı qalady. Sol sátten bastap taǵdyr tálkegine ushyrap, qıyn sátterdi bastan keshedi. Abaısyzda jasaǵan «qylmysy» úshin sol zamanda keńes túrmesinde keminde 5 jyl otyrýy múmkin bolsa, Qytaıda tipti atý jazasy kútip tur edi. Oǵan Qytaıdaǵy qazaq otbasy kómek qolyn sozady.
Stsenarıı avtory jáne prodıýseri Erbol Boranshynyń aıtýynsha, fılmniń maqsaty qaıda júrse de qazaqtyń qany bir ekenin jáne izgilikte shekara bolmaıtynyn kórsetý.
«Bul jobany Sábıt Qurmanbekov aǵamyzben birge 2015 jyldan bastap qolǵa alǵan bolatynbyz. Qytaıǵa adasyp ótip ketken jigitti hal ústinde jatqanda sol jaqtaǵy qazaqtyń úlken aqsaqaly taýyp alady da, qutqaryp, osy bala úshin erlikke barady. Ózine de tóngen qaterge qaramaı, shekaradan qaıta ótkizip jiberýge kómektesedi. Bul oqıǵa arqyly qazaqtyń qaıda júrse de elim-jerim dep soqqan júregi bir ekenin túsinýge bolady. Sondaı-aq adamgershilikti, baýyrmaldyqty eshqandaı shekara bóle almaıtyndyǵyn aıtqymyz keldi. Jalpy kınony túsinetin jáne ultjandy, júregi qazaq dep soǵatyn azamattardyń barlyǵyna qyzyqty, áserli bolady dep oılaımyn», - deıdi Erbol Boranshy.
Belgili stsenarıst aqyn, dramatýrg Ularbek Nurǵalymuly kórkem týyndynyń kórermenge bereri kóp ekendigin aıtady.
«Qarapaıym kórinister, detaldar arqyly úlken dúnıeni jetkize bilgen. Úńgirde kezdesken adam súıekteri arqyly qazaqtyń qasiretti tarıhyn kóz aldymyzǵa ákelse, sońyndaǵy eski aǵash kópir arqyly qyl kópirdiń ústinde turǵandaı qazaqtyń taǵdyryn beıneleýi erekshe sheberlik dep bilemin. Budan basqa da kóńilge úlken oı salarlyq dúnıeler jeterlik», - deıdi Ularbek Nurǵalymuly.
Aıta keteıik týyndy Mádenıet jáne sport mınıstrliginiń tapsyrysy boıynsha «Boran» stýdııasynda túsirilgen.
Kınotýyndy búginnen bastap Qazaqstannyń barlyq kınoteatrlarynda prokatqa shyqty.