Shette júrgende, Memlekettik rámizderge qurmetimiz arta túsedi - Nurbergen Jumaǵazıev

ORAL. QazAqparat - Shette, elge degen erekshe saǵynysh qushaǵynda júrgende, Memlekettik rámizderge qurmetimiz odan saıyn arta túsedi. Bul týraly Gollandııada jattyǵyp jatqan short-trekten Qazaqstan ulttyq quramasynyń múshesi Nurbergen Jumaǵazıev málim etti, dep habarlaıdy «QazAqparat» tilshisi.

Onyń aıtýynsha, qazirgi kezde qazaqstandyq short-trekshiler Qazaqstannyń eńbek sińirgen jattyqtyrýshysy Mádiǵalı Qarsybekov jáne jas bapker Azamat Sultanálıevtiń basshylyǵymen Herenven qalasynda Gollandııa quramasymen birge jattyǵýda. Jattyǵýdyń mundaı tásili 2016-2017 jylǵy maýsymda jaqsy nátıje bergeni belgili. Qazaqstandyq short-trekshiler osy sport tarıhynda tuńǵysh ret birneshe ret álem kýbogy kezeńiniń jeńimpazy atansa, odan keıin qysqy ýnıversıada men Azııa oıyndarynda júldeli oryndarǵa qol jetkizdi.

 

«Qasymda qazir Abzal Ájiǵalıev, Denıs Nıkısha, Erkebulan Shamýhanov bar. Al Mersaıd Jaqsybaev pen Ádil Ǵalıahmetov Gollandııa jastar quramasymen birge shyńdalýda. Osylaısha, aldaǵy jyldyń basty dodasy - Ońtústik Koreıanyń Phenchhan qalasynda ótetin olımpıada oıyndaryna daıyndyqty bastap kettik. Maqsatymyz - olımpıada joldamasyn jeńip alý. Olımp tórinde elimizdiń kók baıraǵyn bıikte jelbiretip, júldeger atansaq dep armandaımyz. Sol úshin barymyzdy salatyn bolamyz. Qazaq elin Memlekettik rámizder kúnimen quttyqtap, alystan sálem joldaımyn. Qazaqstan patrıoty retinde elimizdiń Týyna, Eltańbasy men Gımnine árkez qurmetpen qaraımyn. Qazaqstanymyzdyń eńsesi bıik bolyp, mártebesi arta bersin», dedi «QazAqparat» tilshisine Nurbergen Jumaǵazıev.

 

Eske sala keteıik, 1990 jyly 29 qarashada Terekti aýdany Shaǵataı aýylynda dúnıege kelgen Nurbergenniń otbasy Oral qalasynda turady. Ata-anasy Batyrǵalı men Zınegúlmen, zaıyby Shynaraımen birge kishkentaı qyzy Nuraı ósip keledi. Qaryndasy Ǵalııa Jumaǵazıeva da short-trekpen turaqty aınalysady, bolashaǵynan úmit kúttiretin jastardyń biri.