Shetsiz qala: Almatynyń eń jas aýdany qalaı ózgerip jatyr?
Memleket basshysy Qasym-Jomart Toqaev óziniń «Jańa jaǵdaıdaǵy Qazaqstan: is-qımyl kezeńi» Joldaýynda teńdestirilgen aýmaqtyq damý týraly aıtqan bolatyn. Almaty qalasynyń ákimi Baqytjan Saǵyntaevtyń Almatyny damytý strategııasy aıasynda «shetsiz qala» qaǵıdasyna erekshe kóńil bóletini belgili, onyń maqsaty - jatyn aýdandardy damytý, megapolıstiń barlyq aýdandarynda turǵylyqty jerine qaramastan halyqtyń joǵary ómir súrý standarttaryn qamtamasyz etý.
Alataý aýdanynda burynnan turǵyndar tarapynan birneshe ret kóterilip kele jatqan jobalar júzege asyrylyp, máseleler sheshilip keledi.
Aldymen baspasóz týry barysynda tilshilerge «halyq únine qulaq asatyn memleket» tujyrymdamasyn iske asyrý aıasynda ashylǵan Alataý aýdany ákimi apparatynyń ǵımaratyndaǵy «Ashyq ákimdik» front-ofısi kórsetildi. Jobanyń basty maqsaty – memlekettik organdardyń azamattar úshin qoljetimdiligin arttyrý, kedergisiz orta qalyptastyrý, halyqqa «bir tereze» qaǵıdaty boıynsha qyzmet kórsetý.
«Munda 4 bólim bar-abattandyrý, turǵyn úı-kommýnaldyq sharýashylyq, kásipkerlik jáne áleýmettik sala. Sonymen qatar, aýdan ákimdiginiń quzyretine kirmeıtin máseleler de bar. Bul jer qatynastary, sáýlet jáne basqa qalalyq basqarmalarǵa qatysty máseleler. Osyǵan baılanysty biz osy mamandardyń jumysyn uıymdastyryp jatyrmyz. Olar aptasyna eki ret qala turǵyndaryn qabyldaıdy. Aýdandyq keńse de osynda ornalasqan, suraqtardy jınap, tıisti basqarmaǵa jiberedi», - dedi aýdan ákimi Azamat Qaldybekov.
Odan keıin tilshiler «Alataý analary» qorynyń úlgisinde halyqtyń áleýmettik turǵydan az qamtylǵan toptaryna kómek kórsetetin qoǵamdyq qorlardyń qyzmeti tanystyryldy. Qorda tiginshi, vızajıst, shashtaraz, kirpik uzartý mamany bolyp 12 ana jumys isteıdi. Qor sonymen qatar áıelder men balalardy tigin isine, kosmetologııaǵa, bıge, mýzykalyq aspaptarǵa úıretýge múmkindik beredi. Osy ortalyqta barlyǵy 2500-den astam adam oqytyldy.
Sonymen qatar, «Jumyspen qamtý jol kartasy» memlekettik baǵdarlamasy aıasynda júzege asyrylyp jatqan Aqbulaq shaǵyn aýdanyndaǵy skverdiń jóndeýden keıingi kelbeti tanystyryldy.
Saıabaqta balalar men sport alańdary, jekpe-jek alańdary bar. Oryndyqtar, ýrnalar, kósheni jaryqtandyratyn 17 tirek ornatyldy. 1280 sharshy metr tósem tóseldi. Aýdan ákimi atap ótkendeı, bul saıabaqty qurý máselesi Almaty qalasy ákiminiń aýdan turǵyndarymen kezdesýi kezinde kóterilgen bolatyn.
«Osy saıabaqta balalarǵa arnalǵan jańa balalar jáne oıyn alańdary ornatyldy. Demeýshilerdiń kúshimen sportpen aınalysý úshin sporttyq manej saldyq. Búgingi tańda balalar sporttyń 6 túri taekvondo, karate, boks, kúres jáne kýdo boıynsha jattyǵýǵa múmkindik aldy», - dedi aýdan ákimi.
Aralas jekpe-jekten 3 dúrkin álem chempıony Ardaq Nazarov sporttyq nysannyń balalardy tárbıeleýde mańyzy zor deıdi.
«Men osy aýdanda óstim. Shańyraq shaǵyn aýdanynda 1994 jyly 14 jastaǵy balamyn. Jol joq, jaryq, sý joq, jaǵdaı joq, sonda da jattyǵyp óstik. Búgin el damyp jatqan kezde atqarylyp jatqan bul ister memlekettiń janashyrlyǵynyń belgisi dep bilemin. Tek sózben aıtpaı dálel retinde ashylyp jatqan balalar alańy sport alańdary, jazǵy sport alańdary úlken ónege bolyp otyr. Maǵan sportshy retinde kóp ata ana jazady. Qalaǵa balamyzdy bere almaımyz, alys, keptelisi bar. Qazir úıden shyqtyńyz, ortalyq qasynyzda, aqysyz. Balalar sportshy bolmasa da bapkerden tálim-tárbıe alsa, nur ústine nur emes pe», - dedi Ardaq Nazarov.
Bıyl 17 qyrkúıekte Alataý aýdanynda «Shyńǵa órleý» baǵdarlamasy aıasynda «Dombyra ortalyǵy» áleýmettik nysany ashyldy. Demeýshilerdiń kómegimen ortalyqqa qural-saımandar satyp alyndy. Ǵımaratqa jóndeý júrgizilip, irgeles aýmaq abattandyryldy. Ortalyqta dombyra oınaýdy 100 bala meńgeredi.
«Dombyra ortalyǵyna kelgen balalar kúıshi bolyp ketpese de, ulttyq tárbıeni boıyna sińirip ósse degen oımen ashyldy. Dombyra tartyp ósken balanyń tárbıesi jaqsy bolady. Óskeleń urpaq telefon oınaýmen de ýaqytyn ótkizip jatyr. Sol ýaqytty aptasyna 3 ret dombyraǵa bólip jatyrmyz. Munda kez-kelgen oqýshy kelip jazyla alady», - dedi Alataý aýdany Mádenıet jáne tilderdi damytý bólimi basshysynyń mindetin atqarýshy Juldyz Buzaýqyzy.
Jýrnalıster «Shańyraq-2» shaǵynaýdanynda ornalasqan artezıan bulaǵyna da bardy. Osydan birneshe apta buryn bul jerde tek bir qubyrdan aqqan sýǵa júzdegen adam kezekke turatyn.
Qazir bıznestiń áleýmettik jaýapkershiligi aıasynda aımaq tolyq abattandyrylyp, artezıan sýyna 5 qubyr tútigi ornatyldy.
Sondaı-aq, «Uljan» shaǵyn aýdanyndaǵy sport aımaǵy tanystyryldy. Onda jaqynda fýtbol alańynyń ashylýy ótti. Aýmaqta jattyǵý qurylǵylary ornatylǵan workout aımaǵy bar. Bul nysan da bıznestiń áleýmettik jaýapkershiligi aıasynda salyndy.
Sodan keıin baspasóz týryna qatysýshylar «Shapaǵat» shaǵyn aýdanyna keldi. Onda «Jumyspen qamtýdyń jol kartasy» baǵdarlamasy aıasynda saıabaqtyń aǵymdaǵy jóndeýimen tanysty. Onyń aýmaǵy 13 000 sharshy metr. Ol jerde balalar alańy jáne sport alańdary, fýtbol alańy bar. Kósheni jaryqtandyrý tirekteri, oryndyqtar men ýrnalar ornatyldy.
Baspasóz týrynyń qorytyndysy boıynsha qatysýshylarǵa «Sosnovyı bor « saıabaǵyn aǵymdaǵy jóndeý boıynsha joba tanystyryldy. Bul joba «Jumyspen qamtýdyń jol kartasy» baǵdarlamasy aıasynda da júzege asyryldy. Alańy 3 ga skverdiń aýmaǵynda balalar, basketbol, workout alańdary ornalasqan. Sýarý júıesi bar. 4000 sharshy metr kógal tóselgen. Kóshege jaryqtandyrý jáne oryndyqtar men ýrnalar ornatyldy.