Shetelge júk tasymaldaýǵa ruqsat qaǵazyn berýdiń jańa tetigi engizilmek

<p>Almatyda Kólik mınıstrliginiń avtomobıl kóligi jáne kóliktik baqylaý komıteti qazaqstandyq kólik jáne tasymaldaý salasyndaǵy kompanııa ókilderiniń qatysýymen ótken keńeıtilgen keńes barysynda halyqaralyq avtomobıl júk tasymaldaryn júzege asyrý kezinde tasymaldaýshylarǵa shet memleketterge kirýge múmkindik beretin sheteldik ruqsat blankilerin taratý júıesin reformalaý jobasyn usyndy, dep habarlaıdy <a href="https://kaz.inform.kz/" target="_blank" rel="noopener">Kazinform.</a></p>

Negizgi ózgerister kóleńkeli naryqta blankilerdiń jasandy tapshylyǵyn týǵyzý men olardy zańsyz qaıta satý jaǵdaılaryn boldyrmaýǵa baǵyttalǵan.

QATTK tóraǵasy Altaı Áli kezdesý barysynda júk tasymaldaýshylarǵa, sarapshylarǵa, qoǵam qaıratkerleri men jýrnalısterge atalmysh salanyń túıtkildi máselelerin sheshýge yqpal etetin josparlanǵan sharalar jaıynda aıtyp berdi.

«Blankilerdi taratýdyń qoldanystaǵy júıesi boıynsha qujattardyń 50% aldyńǵy jyldary jumys istegen tasymaldaýshylardyń artyna bekitiledi. Tasymaldaý tarıhy olarǵa aldaǵy ýaqytta blankilerdi alýǵa kepildik beredi. Al qalǵan jartysy rezervtik sanatqa ótedi. Bul jaǵdaıda blankilerdi barlyq basqa tasymaldaýshylar ala alady. Biz bul tásildi múldem durys emes dep sanaımyz, jeke tasymaldaýshylarǵa kepildik bermeýimiz kerek», — dedi A.Áli.

Spıker atap ótkendeı, tasymaldaýshylardyń blankilerge qol jetkizý múmkindikteri teń, ádil jáne erkin básekelestikti shektemeıtindeı bolýy tıis.

Sondaı-aq komıtet tóraǵasy qazir blankiler fırmanyń ataýy da, mashınanyń nómiri de kórsetilmeıtin bos paraq ekenin eske saldy.

Bul retteony paıdalanýǵa 100 kún beriledi.

Alaıda bul blankilerdi taratý júıesinde jasandy tapshylyqtyń paıda bolýyna jaǵdaı jasaıdy.

«Biz júk tasymaldaý faktisi boıynsha ShR berý tetigin engizýdi usynamyz. Onda tasymaldaý tarıhy esepke alynbaıdy, kez kelgen jáne tek qazaqstandyq tasymaldaýshylar naqty júk bolǵan jaǵdaıda blankilerdi ala alady. Qaıta satý úshin alǵysh arttardy tolyǵymen alyp tastaımyz, sonyń ishinde kóliktik baqylaý ınspektsııalaryn blankilerdi taratý protsesterinen shyǵaramyz. Onda adamı faktor bolmaıdy. Blankilerde kompanııalardyń ataýlary men mashınalardyń nómirleri kórsetiledi, al blankilerdiń túp nusqalary shet memleketten oralǵannan keıin tapsyrylady. Bul ShR paıdalanýdyń ashyqtyǵy men baqylaýdy qamtamasyz etedi», — dedi Kólik mınıstrliginiń ókili.

Jalpy, tasymaldaý bıznesi men kólik qaýymdastyqtarynyń ókilderi josparlanǵan ózgeristerdi quptap, memlekettik organdarǵa ótinishterin eskergenderi úshin alǵys bildirdi.

Alaıda, birqatar tasymaldaýshylar avtomobıl kóligi jáne kóliktik baqylaý komıtetiniń keıbir usynystarynyń mánin túsinbeı, jyl basynda blankilerdi ala almaı, keıin blankilerdi taratý júıesinde maýsymnyń sońǵy aıynda, ásirese Eýroodaq shekarasyndaǵy shıelenisti jaǵdaıda ıgerýge bolmaıtyn kóptegen paıdalanylmaǵan ShR-diń paıda bolý máselenin qaıta kóterdi.

«Nelikten bizde jyldyń sońynda paıdalanylmaǵan blankiler paıda bolady? Osy saýal bizdi de qatty alańdatady. Bul qoldanystaǵy blankilerdi taratý júıesindegi qatelikterge baılanysty. Biz qazir blankilerdi paıdalanýǵa 100 kún beremiz. Blankileri bekitilgen tasymaldaýshy óziniń úlgermeıtinin túsingende, olardy júıege qaıtara bastaıdy. Biz bul júıeden ketkimiz keledi. Sondyqtan kólik quraldarynyń tasymaldaý tarıhymen qyzmetine shekteýlerdi alyp tastaýdy kózdeıtin ózgeristerdi usynyp otyrymyz. Aldyn ala taratý bolmaıdy. Naqty ýaqytta: blank aldy — ketti. Bul teńdeı bólýge múmkindik beredi. Ony ózińiz de kóresiz», — dep túsindirdi Altaı Áli.

Sondaı-aq, tóraǵa keńes barysynda otandyq júktasymaly naryǵyndaǵy búgingi jaǵdaıdy sıpattady.

Onyń aıtýynsha, búgingi tańda Qazaqstanda halyqaralyq tasymaldarǵa 20 750 avtokólik parki bar 1883 tasymaldaýshy jumyldyrylǵan.

ShR-ty aıyrbastaý 42 memleketpen júzege asyrylady.

Eldegi halyqaralyq júk tasymaldarynyń jalpy kólemindegi qazaqstandyq tasymaldaýshylardyń úlesi — 45%.

«Qoldanystaǵy ádistememen 2022 jyly bizde blankilerdiń tek 45% — y ǵana paıdalanyldy, qalǵany– 55%. 2023 jyly bizde 270 myń blanktiń 58%-y paıdalanyldy. Ótken jyly QHR baǵytynda S sanatyndaǵy blankiler 113 myńǵa deıin ulǵaıdy. Qytaımen aıyrbastaý shamamen 50 myń ShR boldy. Alaıda bul kóleńkeli naryqta qaıta satylýyna jaǵdaı jasaǵan, 1 AEK mólsherindegi naqty baǵasyn 3 myń dollarǵa deıin jetkezgen turaqty tapshylyqqa alyp keldi», — dedi A. Áli.