Shetelge qonys aýdarǵan qazaqstandyqtar sany 27% tómendedi
Ranking.kz portalynyń málimetinshe, 2022 jyl Qazaqstannyń syrtqy kóshi-qon vektoryn ózgertti.
Sońǵy onjyldyqta alǵash ret ózgeshe úrdis baıqaldy. Sońǵy bir jylda emıgranttar sany 8 myń adamǵa - 32,3 myńnan 24,2 myń azamatqa qysqardy.
Sonymen qatar, Qazaqstandy turaqty turatyn el retinde qarastyratyn kelýshiler sany da arta tústi.
Eger 2021 jyly mundaı 11 myń sheteldik bolsa, 2022 jyly olardyń sany 56,7 paıyzǵa artyp, 17,3 myń adamǵa jetken.
Osy eki faktor kóshi-qon teńgerimine eleýli áser etti. Kelgenderge qaraǵanda ketkender kóp bolǵanymen, jalpy úrdis oń.
Mıgratsııa saldosy, ıaǵnı ketkender men kelgenderdiń aıyrmashylyǵy sońǵy on jylda teris boldy. Jyl saıyn bul alshaqtyq arta tústi.
Eger 2014 jyly bul kórsetkish mınýs 12,2 myń bolsa, 2019 jyly Qazaqstan halqy kóshi-qon aǵynynyń joǵary bolýyna baılanysty 33 myń azamatqa qysqardy.
Pandemııa kezindegi lokdaýnǵa baılanysty ketýshiler jospary oryndalmaı qaldy.
2020 jyly saldo mınýs 17,7 myń boldy. 2020 jyly ketýi tıis bolyp kete almaı qalǵandar 2021 jyly kóshti.
Bul birden Ulttyq statıstıka bıýrosynyń statıstıkalyq esepterinde kórinis tapty: ketkender sanynyń óskeni baıqaldy, al saldo mınýs 21,2 myń adamǵa jetti.
Al byltyr bul aıyrmashylyq nebári 6,9 myń adamǵa deıin qysqardy.
Jalpy, Eńbek jáne halyqty áleýmettik qorǵaý mınıstrliginiń málimetinshe, 2011 jyldan 2022 jyldyń qazan aıyna deıin elden 367,1 myń adam ketken.
Eńbekke jaramdy emıgranttardyń 38 paıyzynyń - joǵary, 34 paıyzynyń - orta kásiptik bilimi bar.
Sonymen qatar, sońǵy 10 jylda elimizge kelgen joǵary bilimi bar sheteldikter sany eki eseden asa azaıǵan.
2021 jáne 2022 jyldardaǵy emıgranttar sanyndaǵy aıyrmashylyq negizinen Reseı Federatsııasyna ketken qazaqstandyqtar sanynyń azaıýyna baılanysty boldy.
Mundaı adamdar birden 27,1% paıyzǵa nemese 7,2 myń adamǵa azaıdy.
Kóship ketýshi slavıan qazaqstandyqtar sany da qysqardy. 2022 jyly Qazaqstannan ketýge sheshim qabyldaǵan orystar sany 5,7 myńǵa — 21,8 myńnan 16,1 myń adamǵa deıin qysqardy.
Kóship ketken ýkraın men belorýs sany 700-den astamǵa azaıdy. Statıstıkaǵa nemister de áser etti: Qazaqstannan osy ulttyń 2,3 myń ókili ketken.
Qazaqstanǵa kelýshiler sanynyń artýyna ne áser etti? Reseılik qonys aýdarýshylar Qazaqstanǵa kelýshilerdiń kóbeıýine ishinara ǵana áser etti.
Qazaqstanǵa qonys aýdarǵan 17,3 myńnyń ishinde reseılikter tek úshten birin nemese 5,9 myń adamdy (biraq aıtarlyqtaı 2,4 myń adamǵa kóbeıgen) qurady.
QR-ǵa kóship kelýshilerdiń eń kóp úlesin Ózbekstan azamattary (6,5 myń adam, ósim 2,4 myń adam) qurap otyr.