Shetelge ketken qyzmetshige eńbekaqy tólep kelgen: Aqmola oblysynda ákimder jazaǵa tartyldy
Keńeste aıtylǵandaı, Prırechın aýyldyq okrýginiń ákimi M.Jándildın 2023 jylǵy maýsym aıyndaǵy jumys ýaqytyn esepke alý tabelinde J.Zýltaı esimdi áleýmettik qyzmetshi 8 saǵattyq jumys kúnimen 2023 jyldyń 14,15,16 maýsym kúnderi tabel toltyrǵan. Al, ol bolsa, sol kúnderi, ıaǵnı 14-24 maýsym aralyǵynda Astana qalasynan Mońǵolııanyń Baıan Ólgeı aımaǵyna poıyzben ketken.
Dál osyǵan uqsas jaǵdaı boıynsha Jarlykól aýyldyq okýrginiń ákimi M.Saǵyntaevqa qatysty tártiptik is qaraldy. Munda da áleýmettik qyzmetshi D. Hashabaı 2022 jyldyń 17 maýsym men 9 shilde aralyǵynda, sondaı-aq 2023 jyldyń 10-17 aqpan aralyǵynda Astana qalasynan Mońǵolııanyń Baıan Ólgeı aımaǵyna poıyzben ketken. Alaıda, Jarlykól aýyldyq okrýginiń ákimi M.Saǵyntaev 2022 jylǵy maýsym-shilde jáne 2023 jylǵy aqpan aılaryndaǵy jumys ýaqytyn esepke alý tabelinde áleýmettik qyzmetshiniń jumys ornynda naqty bolmaǵan kezeńinde 4 saǵattyq jumys kúnin kórsetti.
«Osylaısha, Memlekettik qyzmet týraly Zańnyń 50-baby 1-tarmaǵynyń 4) tarmaqshasyn buzǵany úshin Tselınograd aýdanynyń ákimine Jarlykól jáne Prırechın aýyldyq okrýgteriniń ákimderi M. Saǵyntaev pen M.Jándildınniń «qyzmetine tolyq sáıkes emes týraly eskertý» túrindegi tártiptik jaza qoldaný usynyldy. Qaraý nátıjeleri boıynsha Ádep jónindegi keńes tıisti usynystar men sheshimder shyǵardy», - dedi Aqmola oblysy boıynsha Memlekettik qyzmet ister departamentiniń baspasóz qyzmetinen.
Aıta ketsek, budan buryn Aqmola oblysynda ákimniń turǵyndy urǵanyn jazǵan edik.