Shetelge ketken ІT mamandar elge qaıtyp oralady – Darhan Ahmed-Zákı

ASTANA. QazAqparat – Qazirgi tańda Qazaqstanda ІT naryq tolyq qalyptasqan. Ortalyq kommýnıkatsııalar qyzmetinde ótken brıfıngte Ǵylym jáne joǵary bilim komıtetiniń tóraǵasy Darhan Ahmed-Zákı osylaı málimdedi, dep habarlaıdy QazAqparat tilshisi.

Brıfıngide jýrnalıster shetelge ketip jatqan ІT salasynyń mamandaryna qatysty saýal qoıyp, munyń Qazaqstandaǵy naryqqa qalaı áser etinin surady.

«Aqparattyq-tehnologııa tek Qazaqstan ekonomıkasynyń sheńberinde damymaıdy. Bul – álemdik úrdis. Ózderińiz bilesizder, Prezıdentimiz AQSh-qa barǵanda «Digital Nomads» degen toppen kezdesti. Onyń ishindegi kópshiligi sheteldik alpaýyt kompanııalarda jumys istep jatqan qazaqtyń balalary. Solardyń kóbi qazir lektsııa oqyp, óz bilimderin berip jatyr. Olardyń maqsaty – eń aldyńǵy qatarly bilimdi ózimizdiń jastarymyzǵa jetkizý. Eger qazaqstandyqtardyń qaısybiri shetelge ketip jatsa, men aıtqan osy mysalǵa sáıkes qaıtyp keledi», - dep jaýap qatty Darhan Ahmed-Zákı.

Onyń aıtýynsha, álemdik deńgeıde ótken bilim olımpıadalarynda top jarǵan qazaqstandyqtardy belgili kompanııa ókilderi iriktep alyp, jumys usynyp jatyr.

«Qazirgi tańda Qazaqstanda tolyqqandy naryq qalyptasqan. Kóptegen ІT mamandar búginde elimizde keń taralǵan bank qosymshalary men solardyń baǵdarlamalyq qamtamasyz etýi boıynsha jumys jasaıdy. Ondaı mamandardy saqtap qalý úshin sáıkes jalaqy tólenedi. Bul Qazaqstandaǵy ІT ındýstrııanyń damýyna zor septigin tıgizip jatyr ǵoı dep oılaımyn. Ketip qalyp, qaıtyp elge oralyp jatqandary da bar», - dep túıindedi komıtet tóraǵasy.

Buǵan qosa, Darhan Ahmed-Zákı ýnıversıtetterde oqýlyqtardy planshetter almastyrýy múmkin be degen suraqqa jaýap berdi. Onyń aıtýynsha, mundaı usynysty joǵary oqý oryndaryna engizý josparda joq.