Sheteldikterge jer berý talqylanǵan joq jáne qaralmaıdy da – Úkimet basshysy

<p>Aýyl sharýashylyǵyna arnalǵan jer telimderi sheteldik ınvestorlarǵa berilmeıdi. Bul týraly Premer-Mınıstr Álıhan Smaıylov málim etti, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

Búgin Senattyń jalpy otyrysynan keıin tilshiler Úkimet basshysynan Batys Qazaqstan halqy qytaılyqtarǵa jer berýge qarsylyq bildirip, úndeý joldap jatqany jaıynda suraq qoıdy.

Óz kezeginde Álıhan Smaıylov Qazaqstannyń Jer kodeksinde sheteldikterge nemese shetel kompanııalaryna, sondaı-aq sheteldikterdiń qatysýymen jumys istep jatqan qazaqstandyq kompanııalarǵa aýyl sharýashylyǵyna arnalǵan jerdi paıdalanýǵa berýge tyıym salynǵanyn eske saldy.

«Mundaı quqyq tek Qazaqstan halqynda ǵana bar. Sondyqtan sheteldikterge jer berý qaralyp jatqan joq jáne qaralmaıdy da. Bul — bizdiń naqty ustanym. Osy jóninde Memleket basshysy naqty pikirin aıtqan edi. Sondyqtan shyndyqqa janaspaıtyn aqparat tarap jatyr. Keıbir ınvestorlar ózderiniń usynystaryn aıtqan. Budan ári asqan joq, ıaǵnı eshqandaı kelisim jasalmaǵan», — dedi Premer-Mınıstr.

Budan buryn habarlanǵandaı, jaqynda Batys Qazaqstan oblysynyń ákimi Narıman Tóreǵalıev kıik etin jáne ózge de bólikterin óńdeý týraly saýalǵa jaýap bergen. 

Aımaq basshysy kórshi elden ınvestor kelip, zaýyt salýǵa usynys bildirgenin aıtty.

Alaıda jer berý týraly sheshim bolmaǵan.