Sheteldikterge Qazaqstan vızasyn alý qıyndaı tústi

<p>ASTANA. KAZINFORM — Qazaqstanǵa kirýge vıza rásimdeý erejesi ózgerdi. Endi elge keletin sheteldikter otbasyn asyraı alatyn qarjysy baryn rastaýy kerek. Bul talap olardy shaqyrýshy tarapqa da qatysty.</p>

Bul memleket basshysy ótken aptada qol qoıǵan «Halyqtyń kóshi-qony jáne qylmystyq-atqarý júıesi salasyndaǵy zańnamalyq aktilerge ózgerister men tolyqtyrýlar engizý týraly» zańda kórsetilgen.

Kóshi-qon zańnamasyn jetildirýge baǵyttalǵan ózgerister jóninde ІІM resmı ókili Shyńǵys Álekeshev málimdedi.

Májilis depýtattary bastamashy bolǵan bul zań arqyly Qazaqstan Respýblıkasynyń 7 kodeksine jáne 13 zańyna ózgeris engizilgen.

Atap aıtqanda:

— Qazaqstanǵa kirýge tyıym salý; 
— Balalarǵa qatysty buryn jynystyq sıpattaǵy qylmys jasaǵan ımmıgranttarǵa turaqty turýǵa jáne bizdiń azamattyǵymyzdy alýǵa ruqsat berýden bas tartý;
— Sheteldikterdiń ekstremıstik nemese terrorıstik áreketterge qatysy bar ekendigi týraly málimetter bolsa, elge kirýge tyıym salý;
— Uıymdasqan toptardyń kóshbasshylary bolyp tabylatyn, aýyr qylmystary úshin sottalǵan sheteldikterdiń elge kirýine tyıym salatyn negizderdi qatańdatý.

«Halyqtyń kóshi-qony týraly zańǵa jańa baptar engizildi. Olarǵa sáıkes sheteldik jumys kúshin paıdalanatyn zańdy jáne jeke tulǵalardy tekserý tártibi zańnamalyq deńgeıde bekitiledi. Bul kóshi-qondy baqylaýdyń tıimdiligin arttyryp, júıeli túrde jasalatyn jáne jasyryn quqyq buzýshylyqtardy anyqtaýǵa múmkindik beredi. Otbasymen qaýyshý ınstıtýtyn nyǵaıtý maqsatynda endi Qazaqstan Respýblıkasyna kelýge vızany resimdeý kezinde otbasy múshelerin qarjylyq turǵyda qamtamasyz ete alatynyn ne shaqyrýshy tarap, ne shaqyrylǵan adam rastaýy qajet. Buryn bul talap tek shaqyrýshy adamǵa ǵana qatysty bolatyn», -dedi Shyńǵys Álekeshev.

Ózgeris «Azamattyq týraly» zańǵa da engizilgen. Máselen, memlekettik tildi qarapaıym deńgeıde, elimizdiń tarıhy men konstıtýtsııasynyń negizderin bilmegen jaǵdaıda azamattyq berilmeıdi. Qajetti deńgeıdi Ǵylym jáne joǵary bilim mınıstrligi aıqyndaıtyn bolady.

«Túzetýler azamattardyń qoǵamǵa tez beıimdelýin kódeıdi. Tildi bilý qoǵamǵa tezirek sińip, memleket ómirine aralasýy úshin qajet. Aıta ketý kerek, bul túzetýler álemdik tájirıbege saı. Kóptegen elderde azamattyq alý úshin memleket tarıhy men memlekettik tildi bilý boıynsha emtıhan tapsyrý qajet», -deıdi ІІM resmı ókili.

 

Altynbek Ámıt