Londonda sheteldikter naýryz kóje pisirip úırendi
Daıana Serbııanyń, Stefanı Avstrııanyń jáne Nıhal Lıvannyń azamaty. Biri aýdarmashy, ekinshisi kitaphanashy, úshinshisi arab tiliniń muǵalimi.
Olarǵa Ulybrıtanııadaǵy Qazaq ortalyǵynyń belsendi ókili Sholpan Kesıjı jáne Londonda jumys babymen ýaqytsha turyp jatqan qazaqstandyq qyz-kelinshekter ulttyq taǵamnyń quramyna kiretin jeti dándi táptishtep túsindirip berdi.
«Búgin ózim úshin jańa taǵam túrin ashyp, erekshe áser aldym. Naýryz kójeniń ishine ne qosylatynyn úırendim. Eger jeti dándi bólek-bólek jese, mundaı dámdi bolmas edi. Til úıirer óte sińimdi kóje boldy», — deıdi Serbııa azamaty Daıana Mılanovıch.
«Іshine molshylyqtyń joralǵysy sanalatyn dánder qosylady eken. Bizde de osyǵan uqsas kóje bar. Úılený toıyn jasap jatqan otbasy ózderiniń aýqatty ekenin kórsetý úshin kójeniń ishine bárin qosady», — deıdi Avstrııa azamaty Stefanı Barbıer.
Naýryz kójeden bólek syıly qonaqtardyń qurmetine úlken as tartyldy. Buǵan deıin jylqynyń etin jep kórmegen sheteldikter aýyldan aldyrylǵan qazy-qartanyń dámin tatyp, tańdanystaryn jasyrmady.
«Jylqynyń eti men kútkendeı emes, kerisinshe óte dámdi boldy. Álbette, budan keıin de jep kórgim bar. Raqmet! Aldaǵy ýaqytta Qazaqstanǵa baryp, saıahattaǵym keledi. Óıtkeni elderińiz týraly kóp estidim. Endi bárin óz kózimmen kórý — armanym», — deıdi Lıvan azamaty Nıhal Nıhaılı.
«Biz shetelde tursaq ta júregimiz Qazaqstan dep soǵady. Sodan osyndaı elimizdi saǵynyp, dostarymyz, balalarymyzben birge jınalyp, ózimizdiń taǵamdarymyzdy pisiremiz. Al búgin sol sheteldikterge baı dástúrimizdi kórsetip, úlken dastarhan jaıdyq», — deıdi Qazaq ortalyǵynyń ókili Sholpan Kesıjı.
Tumandy Albıondaǵy Qazaq ortalyǵynyń ashylǵanyna kóp ýaqyt bola qoıǵan joq. Ol baı mádenıetimizdi, kórkem tilimizdi jáne ulttyq dástúrlerimizdi jergilikti halyq arasynda keńinen nasıhattap, Ulybrıtanııadaǵy qandastarymyzdyń basyn biriktirip júr.
Aldaǵy ýaqytta qazaq tilin úıretetin kýrs ashýdy josparlap otyr. Sondaı-aq qazaqstandyq dızaınerler men qolónershilerdi Londonǵa shaqyryp, jármeńke ótkizbekshi.