Sheteldik telebaǵdarlamalardy retranslıatsııalaý 10 paıyzǵa deıin azaıtylmaq

<p>Elimizde sheteldik tele, radıobaǵdarlamalardy retranslıatsııalaý 20-dan 10 paıyzǵa deıin azaıtylmaq. Bul jaıynda Senat depýtattarynyń saýalyna Premer-Mınıstrdiń orynbasary Tamara Dúısenovanyń jaýabynda aıtylǵan, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

«Memlekettiń múddelerin, qoǵamnyń suranysyn jáne medıa salany damytý úrdisterin eskere otyryp, Memleket basshysynyń tapsyrmasyn oryndaý maqsatynda «Mass-medıa týraly» zań jobasy ázirlendi. Qazirgi ýaqytta atalǵan zań jobasy Parlament Májilisiniń qaraýynda», - dep atap ótedi Tamara Dúısenova jaýabynda.

Onyń atap ótýinshe, atalǵan zań jobasynda memleket múddelerin jáne qoǵam men jýrnalıstik qoǵamdastyqtyń qazirgi zamanǵy suranystaryn eskeretin normalar kózdelgen.

«Bul rette, Parlament Májilisiniń depýtattarymen telearnalarda til balansyna qoıylatyn talaptardy kúsheıtýge baǵyttalǵan normalar usynylyp, basym kópshiligimen kelisildi. Osylaısha, «Mass-medıa týraly» zań jobasynda otandyq telearnalarda sheteldik telehıkaıalardy kórsetýdiń úlesin shekteý maqsatynda sheteldik tele, radıobaǵdarlamalardy retranslıatsııalaýdy 20 paıyzdan 10 paıyzǵa deıin azaıtý kózdelgen. Qazaq tilindegi tele, radıobaǵdarlamalardyń apta saıynǵy kólemin 50-den 70 paıyzǵa deıin, ıaǵnı 20 paıyzǵa ulǵaıtý usynylýda», - dedi Úkimet basshysynyń orynbasary.