Bul saýalǵa Eńbek jáne halyqty áleýmettik qorǵaý mınıstri Svetlana Jaqypova jaýap berdi.
— Eńbek naryǵyna qatysty alańdaýshylyq bolmaýy tıis dep oılaımyn, ekonomıka turǵysynan alǵanda belgili bir serpin paıda bolady. Sebebi stýdentter kelgende, olardyń ata-anasy da keledi, bul ekonomıkaǵa úles, sebebi olar páter jaldaıdy, túrli qyzmetti paıdalanady, — dedi Svetlana Jaqypova Májilistiń jalpy otyrysynan keıin ótken baspasóz máslıhatynda.
Mınıstrdiń málimdeýinshe, stýdenttik vıza berý protsesi quqyq qorǵaý organdary tarapynan baqylanady.
— Bir stýdent elimizde jumysqa tursa, birneshe jumys ornyn ashýǵa yqpal etýi múmkin. Sondyqtan alańdaýǵa sebep joq, — deıdi ol.
Eske sala ketsek, Úkimet otyrysynda Ǵylym jáne joǵary bilim mınıstri Saıasat Nurbek sheteldik stýdentterge Qazaqstanda jumys isteýge múmkindik beretin vıza engizý týraly málimdegen edi.