Sheteldik BAQ-taǵy Qazaqstan: Jylý elektr stansalaryn salý jáne AÓSShK keńeıtý
Akipress.com: Qazaqstan men Reseı úsh JEO salý jóninde kelisimge qol qoıdy
Akipress.com aqparat agenttigi Qazaqstan úkimeti reseılik seriktestermen Kókshetaý, Semeı jáne Óskemende jylý elektr stantsııalaryn salý týraly kelisimge qol qoıǵany týraly habarlady.
«2027 jyly Semeı men Kókshetaýda qosymsha jylý elektr stantsııalary salynady. Sonymen qatar Óskemende 2030 jyly paıdalanýǵa beriletin jylý elektr ortalyǵyn salý josparlanýda», - delingen Akipress.com maqalasynda.
Kelisimsharttarǵa Qazaqstan Prezıdenti Qasym-Jomart Toqaevtyń Sankt-Peterbýrgke resmı sapary barysynda qol qoıylǵan. Sondaı-aq, maqalada úsh jylý elektr stantsııasynyń damýy eldegi elektr energııasyn óndirýdiń jalpy qýatyn arttyrýǵa múmkindik beretini týraly jazylǵan.
Caspian news:Qazaqstandaǵy alǵashqy AES quny 15 mıllıard dollarǵa deıin jetýi múmkin
Caspian news agenttigi Qazaqstanda atom elektr stansasyn salý múmkindigin talqylap, «Qazaqstan atom elektr stantsııalary» kompanııasynyń basshysy Tımýr Jantıkınge silteme jasaı otyryp maqala jarııalady. Ol eldegi alǵashqy atom elektr stantsııasynyń qurylysy 15 mıllıard dollarǵa deıin jetýi múmkin ekenin aıtqan.
«Birinshi stantsııanyń quny 10-15 mıllıard dollardy quraıdy. Qazir qarjylandyrý kózi pysyqtalyp jatyr», - deıdi Tımýr Jantıkın.
Basylymnyń habarlaýynsha, Tımýr Jantıkın qazirgi ýaqytta joba júzege asyrylyp jatpaǵanyn jáne osy ýaqytqa deıin jasalǵan kúsh-jiger joba aldyndaǵy is-sharalardyń bir bóligi ekenin atap ótti. Sonymen qatar, maqalada Qazaqstanda atom elektr stansalaryn salý máselesi jalpyhalyqtyq referendým qorytyndysy boıynsha sheshiletini jazylǵan.
Apa.az: Qazaqstan tálipterdi tyıym salynǵan uıymdar tiziminen shyǵardy
Ázerbaıjandyq Apa.az medıaholdıngi Qazaqstan tálipterdi tyıym salynǵan uıymdar tiziminen shyǵaryp tastady dep habarlady.
«Qazaqstan bıligi tálipterdi tyıym salynǵan uıymdar tiziminen shyǵarý týraly sheshim qabyldady. Bul týraly Qazaqstan Respýblıkasy Syrtqy ister mınıstrliginiń resmı ókili Aıbek Smadııarov málimdedi», - dep habarlaıdy Apa.az.
Budapest Business Journal: MOL kompanııasy Qazaqstandaǵy gaz ken ornynda óndiris bastady
Budapest Business Journal iskerlik jýrnaly Qazaqstan, Majarstan jáne Qytaı kompanııalarynyń Qazaqstandaǵy gaz ken ornynda óndiris bastaǵany týraly maqala jarııalady.
«MOL kompanııasy (Vengrııa munaı kompanııasy) Qazaqstannyń batysyndaǵy Rojkov gaz kondensaty ken ornynda birinshi uńǵyma táýligine 300 myń tekshe metr shıki gaz debıtimen óndirýdi bastaǵanyn habarlady. Bir uńǵyma óndirisinde bolǵan tájirıbelik kezeńde Rojkovskoe ken ornynda toptyq deńgeıde táýligine 1300 barrel munaı óndiriledi dep kútilýde», - delingen maqalada.
Jýrnaldyń málimetinshe, taǵy tórt uńǵyma 2024 jyldyń úshinshi toqsanynda paıdalanýǵa beriledi, bul táýligine 1,5 mln tekshe metr gaz óndirýdi ulǵaıtýǵa múmkindik beredi.
AzerNews: Saýd Arabııasy AÓSShK-ge onynshy baqylaýshy memleket retinde qosyldy
Azernews gazeti Saýd Arabııasynyń Azııadaǵy ózara is-qımyl jáne Senim Sharalary jónindegi keńeske (AÓSShK) baqylaýshy memleket retinde qosylǵany týraly jazady. Agenttiktiń málimetinshe, Qazaqstan uıymǵa 2024 jylǵa deıin tóraǵalyq etedi.
«Saýd Arabııasy – Parsy shyǵanaǵy elderiniń biri. Qazirdiń ózinde osy óńirdiń Bahreın, Katar, Kýveıt jáne BAÁ sııaqty memleketteri AÓSShK uıymyna belsendi qatysýshy retinde kiredi. Saýd Arabııasy Koroldiginiń baqylaýshy mártebesi AÓSShK-degi osy sýbaımaqtyń ókildigin odan ári keńeıtip, osylaısha Azııadaǵy yntymaqtastyqty baıytady», - delingen Azer News maqalasynda.
The Hindu: Mahatma Gandı ýnıversıteti Qazaqstan ýnıversıtetimen birigip qyzmet etedi
Úndistannyń The Hindu gazeti Kottaıam qalasyndaǵy Mahatma Gandı ýnıversıteti (MGÝ) Qazaqstandaǵy M.Áýezov atyndaǵy Ońtústik Qazaqstan ýnıversıtetimen áleýmettik mańyzdy ǵylymı-zertteý baǵdarlamalaryn júzege asyrý úshin birigip jatqanyn habarlady.
«Mahatma Gandı ýnıversıteti prorektory K. T. Aravındkýmar qazaqstandyq JOO basshylyǵymen keńes ótkizdi. Resmı málimdemede seriktestikte klımattyń ózgerýi jáne sý tazartý sııaqty taqyryptar basymdyqqa ıe bolatyny jáne bul usynystardy qazaqstandyq qarjylandyrý agenttikterine jiberýge bolatyny aıtylǵan», - delingen The Hindu maqalasynda.
Aravındakýmar myrzanyń aıtýynsha, eki ýnıversıtet arasynda jaqynda qol qoıylǵan ózara túsinistik týraly memorandým ártúrli salalardaǵy yntymaqtastyqty arttyrýǵa baǵyttalǵan strategııalyq qadam.