Sheteldik BAQ-taǵy Qazaqstan: ıÝNESKO basqarýshy organyna múshelik, buıyrmaǵan Eýro-2024 joldamasy
Bnn.network: Qazaqstan ıÝNESKO-nyń Dúnıejúzilik muralar komıtetine múshe bolyp saılandy
Bnn network agenttigi 23 qarashada Qazaqstan 2023-2027 jyldarǵa Dúnıejúzilik muralar komıtetiniń múshesi bolyp saılanǵany týraly habarlady. Qazaqstan Dúnıejúzilik mádenı murany qorǵaý jónindegi konventsııaǵa múshe memleketteri Bas assambleıasynyń 24-shi sessııasynda daýys berý nátıjesinde 2023-2027 jyldarǵa ıÝNESKO-nyń Dúnıejúzilik muralar komıtetiniń múshesi bolyp saılandy. Qazaqstan atalǵan bedeldi organda 2013-2017 jyldary da jumys atqarǵan jáne aldaǵy qyzmetine laıyqty úles qosýǵa daıyn.
El kandıdatýrasyna 118 memleket qoldaý bildirgen. Qazaqstanmen qatar Komıtet quramyna taǵy segiz jańa múshe saılanǵan. Olar Vetnam, Kenııa, Koreıa Respýblıkasy, Lıvan, Senegal, Túrkııa, Ýkraına jáne ıAmaıka.
Anadolu: Qazaqstan Prezıdenti Toqaev Gaza tóńiregindegi oqıǵalar álemdik qaýymdastyqty kem degende eki lagerge bólgenin aıtty
Anadolu agenttigi Mınskide ótken Ujymdyq qaýipsizdik sharty uıymy (UQShU) keńesiniń otyrysynda Qazaqstan Prezıdenti Qasym-Jomart Toqaev Taıaý Shyǵystaǵy qaqtyǵys aýqymy jaǵynan jahandyq aqparattyq jáne ıdeologııalyq teketires týdyrǵany týraly málimdegenin habarlady.
«Gaza sektory tóńireginde bolyp jatqan oqıǵalar álemdik qoǵamdastyqty ekige jardy. Soǵys órti barlyq el men kontınentti sharpymaı turǵanda toqtaǵany jón», - dedi Qazaqstan Prezıdenti Qasym-Jomart Toqaev.
Sessııa barysynda UQShU-ǵa múshe memleketterdiń ujymdyq qaýipsizdigin qamtamasyz etýdiń ózekti aspektileri talqylanǵan. Sonymen qatar uıym qyzmetiniń basty baǵyttary boıynsha bıyl atqarylǵan jumystardyń qorytyndysy jasalyp, aldaǵy kezeńniń jospary aıqyndaldy. Budan bólek, memleketter basshylary jahandyq kún tártibindegi máseleler jóninde pikir almasty.
Trend.az: Qazaqstan shetelge 118,3 mıllıon dollarǵa et satty
Trend basylymy 24 qarashada bıylǵy toǵyz aıda (qańtar-qyrkúıek) shetelge qansha tonna et satqany týraly málimdedi.
«Bıylǵy toǵyz aıda (qańtar-qyrkúıek) Qazaqstannan 121,7 mln dollarǵa 42,4 myń tonna et jáne et ónimderi eksporttalǵan, bul 2022 jyldyń sáıkes kezeńimen salystyrǵanda 31,5%-ǵa artyq (32,2 myń tonna)», - dep habarlaıdy Trend
Naqtyraq aıtqanda, jyl basynan beri 118,3 mıllıon dollarǵa 40,3 myń tonna et eksporttalsa, ótken jyly bul kórsetkish osy kezeńde 104 mıllıon dollarǵa 30,4 myń tonna et bolǵan edi. Ósim +32,5 %.
Bul eksporttyń eń kóp kólemi muzdatylǵan sıyr etine qatysty – 4,4 ese ósken (171 tonna – 2023 j., 38,3 tonna – 2022 j.). Bul rette salqyndatylǵan iri qara etiniń eksporty ótken jyldyń qańtar-qyrkúıek aılarymen salystyrǵanda 12,6%-ǵa tómendedi (2023 jyly 11,8 myń tonna, 2022 jyly 13,5 myń tonna).
Hungarytoday: Qazaqstan- Majarstan jyldyq saýda kólemi 1 mıllıard dollarǵa jetýi múmkin
Hungarytoday agenttigi Vengrııadaǵy Qazaqstan-Majarstan strategııalyq keńesiniń 6-shy otyrysynda Majarstan men Qazaqstan ekijaqty taýar aınalymyn múmkindiginshe tezirek jylyna bir mıllıard dollarǵa jetkizý mindetin qoıǵany týraly habarlady.
«Bizde buǵan qol jetkizýge tolyq múmkindik bar», - dedi Majarstan Qarjy mınıstri Mıhalı Varga.
Qazaqstan tarapynyń statıstıkasy boıynsha eki el arasyndaǵy taýar aınalymy 2022 jyly 172 mln AQSh dollaryn qurady, al osy jyldyń 9 aıynda ótken jyldyń sáıkes kezeńimen salystyrǵanda 22%-ǵa ulǵaıǵan.
Taraptar saıası, saýda-ekonomıkalyq, ınvestıtsııalyq jáne mádenı-gýmanıtarlyq salalardaǵy ekijaqty qatynastardyń ózekti máselelerin talqylady. Delegatsııa basshylary saýda-ekonomıkalyq saladaǵy qazaq-majar yntymaqtastyǵy eki el arasyndaǵy strategııalyq áriptestiktiń basty qozǵaýshy kúshi ekenin atap ótti.
Reuters: Slovenııa Qazaqstandy jeńip, Eýro-2024 týrnırine joldama aldy
Reuters agenttigi fýtboldan 2024 jylǵy Eýropa chempıonatyna irikteý týrnırinde Qazaqstan quramasy Slovenııa komandasyna ese jibergenin habarlady. Endi Qazaqstan quramasynyń Ulttar lıgasy arqyly Eýropa chempıonatyna shyǵýyna múmkindigi bar. Kelesi oıyn 2024 jyldyń naýryz aıynda Grekııamen bolady.
Economictimes: Qazaqstan Úndistandy Astana Hub tehnoparkine ınvestıtsııa salýǵa shaqyrady
Economictimes agenttigi Qazaqstan Úndistandy Astana Hub tehnoparkine ınvestıtsııa salýǵa shaqyrdy dep habarlady.
Qazaqstan Respýblıkasy Premer-Mınıstriniń orynbasary – Syrtqy ister mınıstri Murat Nurtileý Úndistandy bıylǵy G20-ǵa tóraǵalyǵynyń tabysty aıaqtalýymen quttyqtady. Astana men Nıý-Delı arasyndaǵy strategııalyq seriktestikke toqtala otyryp, ol Qazaqstan men Jahandyq ońtústik arasyndaǵy yntymaqtastyqtyń mańyzdylyǵyn atap ótip, kólik baılanysyn arttyrý jáne kólik baǵyttaryn ártaraptandyrý qajettigin atap ótti.
Tehrantimes: Irannyń Qazaqstanǵa shıkizattyq emes eksporty 7 aıda 12%-ǵa ósti
Tehrantimes agenttigi Irannyń Qazaqstanǵa shıkizattyq emes eksporty bıylǵy alǵashqy jeti aıda (21 naýryz ben 22 qazan) ótken jyldyń sáıkes kezeńimen salystyrǵanda 12%-ǵa artqany týraly málimdedi.
Irannyń Ónerkásip, ken oryndary jáne saýda úıiniń Saýdany damytý komıssııasynyń ókili Rýholla Latıfı bıylǵy jeti aıda Iran Qazaqstanǵa 104,412 mıllıon dollarǵa munaı emes taýarlaryn eksporttaǵanyn aıtty.
Ol sondaı-aq Iran bıylǵy alǵashqy jeti aıda Qazaqstannan 42,882 mıllıon dollarǵa taýar ımporttaǵanyn, bul ótken jyldyń osy kezeńimen salystyrǵanda 51%-ǵa tómendegenin habarlady. Iran men Qazaqstannyń jyldyq saýda aınalymy da ótken jyly 20 %-ǵa ósti.