Sheteldik avtokólikterdi tirkeý 31 jeltoqsanda aıaqtalady

<p>Shetelden ákelingen avtokólikterdi tirkeýge alý 31 jeltoqsanǵa deıin jalǵasady. Sol sebepti, avtosyn áli kúnge deıin tirkemegen kólik ıeleri tezirek qımyldaýy kerek. Sondaı-aq ýaqyttyń az qalýyna baılanysty túrli alaıaqtar paıda bola bastaǵan. <a href="https://kaz.inform.kz/" target="_blank" rel="noopener">Kazinform</a> tilshisiniń suraqtaryna jaýap bergen Mańǵystaý oblysy Polıtsııa departamenti Ákimshilik polıtsııa basqarmasy protsessıngtik ortalyǵynyń bastyǵy, polıtsııa podpolkovnıgi Erlan Kezbaev osyny eskertti.</p>

- Shetelden ákelingen avtokólikti bir rettik zańdastyrý naýqany bastalǵaly óńirde neshe kólik tirkeldi?

- Prezıdenttiń ótken jylǵy halyqqa joldaýynda 2022 jyldyń 1 qyrkúıegine deıin el aýmaǵyna shetelden ákelingen avtokólikterdi bir rettik alym – 200 myń teńge tóleý arqyly tirkeý tapsyrylǵany belgili. Tapsyrma aıasynda birneshe quzyrly mınıstrlik keńesip, talqylaý arqyly 2023 jyldyń 23 qańtarynan bastap 30 maýsymyna deıin shetelden ákelingen avtokólikterdi tirkeý jumystary bastalyp ketti. Kólik tirkeý aıasynda merzim belgilengennen keıin ótinimderdi qabyldaý 1 shildede toqtatyldy. Al qazirgi tańda 2023 jyldyń 1 shildesine deıin ótinim berip úlgergen, biraq ártúrli sebeptermen tirkeýge kedergiler bolǵan azamattardyń kólikteri boıynsha jumystar jalǵasyp jatyr. Tirkeý bıylǵy jyldyń 31 jeltoqsanyna deıin jalǵasady. Búginge deıin óńirde 17760 sheteldik avtokólik tirkeldi. Onyń ishinde konstrýktor esebinde ýaqytsha tirkeýge qoıylǵandar bar.

- Kólik nelikten ýaqytsha tirkeýge qoıylady?

- Avtokólikter óziniń tirkelgen memleketinde, ıaǵnı shet memlekette tirkeýde tursa, tirkeýden alynbasa nemese qandaı da bir shekteý bolsa olar bizdiń elde ýaqytsha tirkeýge alynady.

- Mańǵystaýǵa avtokólikterdiń basym bóligi qaı memleketterden ákelingen?

- Oblysqa kóbine kólikter Eýrazııalyq odaq memleketterinen, atap aıtsaq Reseı Federatsııasy, Belarýs, Armenııa jáne Qyrǵyzstan memleketinen ákelingen. Sondaı-aq atalǵan elderden kelgen avtokólikter kedendik tazartýsyz 200 myń teńge tólemmen tirkeýge qoıylyp jatyr. Osy sanattaǵy Reseıden ákelingen 3891 avtokólik tirkeldi. Armenııadan - 9767 Qyrǵyzstannan - 45 avtokólik, Belarýsten 4 avtokólik tirkeldi. Odan bólek Evrazııalyq odaqqa jatpaıtyn 3 memleketten ákelingen avtokólikterdi de tirkeý júrip jatyr. Olar kedendik tazartýǵa jatady. Kólikterge kedendik tazartýdan ótkennen keıin ǵana 200 myń teńge tólem qoıylady.

- Kóligin zańdastyratyn azamattar neni eskerýi kerek?

- Avtokólikterdi tirkeýdiń 4 talaby bar. Ol avtokólik 2022 jyldyń 1 qyrkúıegine deıin ákelingen bolýy kerek, odan soń kedendik tazartýdan ótken bolýy qajet. Tirkelgen memlekette izdestirýde nemese qandaı da bir qylmystyq iske qatysy bolmaýy tıis, sondaı-aq kólik quralynyń tirkeý nusqasy orıgınal bolý kerek. Osy talaptarǵa saı bolsa, shetelden ákelingen avtokólik tirkeýge jatady. Azamattar osy talaptardy eskergeni jón.

- Tirkeý ýaqytynyń aıaqtalýyna az ýaqyt qaldy ǵoı?

- Iá, shetelden ákelingen avtokólikterdi tirkeý 31 jeltoqsanǵa deıin jalǵasady. Sol sebepti, áli kúnge tirkemeı júrgen kólik ıeleri tezdetip kelip, tirkeýin suraımyz. Ýaqyttyń az qalýyna baılanysty ártúrli alaıaqtardyń kólik tirkep beremiz degenine senip qalmaýyn eskertemiz. Túrli tásilder arqyly halyq arasynda júrip aqshalaı ne basqalaı kómek kórsetemiz degen aldaý-arbaýǵa urynyp qalmaýlary kerek. Jaqynda osyndaı bir fakt boldy. Oblysymyzda kólikti tirkeý jumystaryn Ákimshilik polıtsııa basqarmasynyń protsessıngtik ortalyǵy bólimi atqarady. Barlyq tirkeý jumysyna jaýapty – osy bólimshe. Sondyqtan barlyq túsinbegen suraqtaryńyz boıynsha bizden aqparat alýyńyzǵa bolady.

- Suhbatyńyzǵa rahmet!