Sheteldiń iri kompanııalary Qazaqstan aýmaǵynda jumys isteýge kelip jatyr

ASTANA. QazAqparat – Shetel kompanııalary Qazaqstan aýmaǵyna kóshý týraly usynys aıtyp otyr. Bul týraly Syrtqy ister mınıstriniń orynbasary Almas Aıdarov málim etti, dep habarlaıdy QazAqparat tilshisi.

«Reseı Federatsııasynan ketetinin resmı túrde jarııalaǵan kompanııalardy kóshirý boıynsha aýqymdy jumystar eskerilgen. Qazirgi kezde biz Qazaqstanǵa kóshirý baǵytynda 401 kompanııaǵa shaqyrtý joldadyq. Bizdiń elshiler kompanııa basshylarymen pikir almasyp jatyr. Osy oraıda, 67 kompanııa kelisip, ózderiniń oń jaýaptaryn berdi. Bular boıynsha tıisti jumystar jalǵasyp jatyr. Al, 25 kompanııa kóshirý jumystaryn aıaqtady», - dedi A. Aıdarov Senatta Qazaqstannyń ınvestıtsııalyq ahýaly tartymdylyǵy taqyrybynda ótip jatqan Úkimet saǵatynda.

Onyń aıtýynsha, kompanııalardy Qazaqstanǵa kóshirý baǵytynda 38 memleket qatysyp otyr. Olar negizinen Germanııa, AQSh, Shveıtsarııa jáne Japonııa sekildi elderge qatysty.

«Kóship kelgen negizgi kásiporyndarǵa toqtalsaq, AQSh-tyń Honeywell kompanııasy Almatyda shaǵyn óndiris ashty. Tanymal Tiktok keńsesin Qazaqstanǵa kóshirdi, Indriver de Qazaqstanda. Avstralııanyń Fortescue kompanııasy, Frantsııanyń Alstom kompanııasy, sondaı-aq OZON Astanada logıstıkalyq park ashady», - dedi mınıstrdiń orynbapsary.

Budan buryn habarlanǵandaı, Qazaqstanda sheteldik ınvestıtsııanyń basym bóligi shıkizat sektoryna baǵyttalyp jatyr.

Ulttyq ekonomıka mınıstri Álibek Qýantyrov munaı men gaz salasyna ınvestıtsııa óskenin aıtty.