Sheteldikterge MÁMS aıasynda medıtsınalyq kómek kórsetile me – ózekti suraqtarǵa jaýap
1. MÁMS júıesindegi saqtandyrylý mártebesin qalaı tekserýge bolady?
Telegram-daǵy Saqtandyru-bot, Qoldau 24/7 mobıldik qosymshasy, egov.kz elektrondyq úkimet saıty jáne Áleýmettik medıtsınalyq saqtandyrý qorynyń fms.kz resmı saıty arqyly tekserýge bolady.
2. Saqtandyrylmaǵan patsıent emhanaǵa tirkele ala ma?
Iá tirkele alady. Biraq tek tegin medıtsınalyq kepildendirilgen kómek kólemine (TMKKK-ge) kiretin medıtsınalyq kómekterdi ǵana ala alady.
3. Saqtandyrylmaǵan jumyssyz júkti áıelge saqtandyrýdyń jeńildikti mártebesin alý úshin ne qajet?
Ýchaskelik dáriger nemese akýsher arqyly júktilik boıynsha esepke turý qajet.
4. Eger adam medıtsınalyq qyzmetterdi paıdalanbasa MÁMS jarnalaryn tóleýden bas tartýǵa bola ma?
Joq, MÁMS júıesindegi jarnalar jeńildikti sanattarǵa jatatyn jáne jarnalardan bosatylǵan adamdardy qospaǵanda, barlyq azamattar úshin mindetti.
5. Sheteldikter MÁMS boıynsha medıtsınalyq kómek ala ala ma?
Iá, tek turýǵa yqtııarhaty bar sheteldikter, EAEO elderinen kóship-qonýshy jumyskerler jáne olardyń otbasy músheleri medıtsınalyq kómek ala alady.
6. Saqtandyrylmaǵan patsıentter emhanadan tegin dári-dármek ala ala ma?
Iá, tek TMKKK-de usynylatyn dáriler tiziminen ǵana alýǵa bolady.
7. Múmkindigi shekteýli jandar men olarǵa kútim jasaıtyn azamattar memleket jarna tóleıtin azamattardyń jeńildikti sanatyna jata ma?
Iá, múgedek balalar jáne bala kezinen birinshi toptaǵy múgedekterge kútim jasaıtyn, biraq jumys istemeıtin adamdar memleket jarna tóleıtin azamattardyń jeńildikti sanatyna jatady.
8. Jumys berýshilerge qandaı sanattaǵy azamattar úshin MÁMS-ke tólemder tóleýdiń qajeti joq?
15 jeńildik sanaty bar azamattar úshin MÁMS jarnalary memleket tarapynan tólenedi. Jumys berýshi sonyń ishinde 5-eýine jarna aýdarmaıdy, olar – balalar, zeınetaqy tólemderin alýshylar, múgedekter, kúndizgi bólimde oqıtyndar, kópbalaly analar, «Altyn alqa», «Kúmis alqa» jáne «Batyr ana» marapaty ıeleri, sondaı-aq I jáne II dárejeli «Ana dańqy» ordenderimen marapattalǵandar.
9. Mindetti áleýmettik medıtsınalyq saqtandyrý (MÁMS) júıesinde qansha aqsha jınalǵanyn qaıdan kórýge bolady?
MÁMS júıesi - jınaqtaýshy júıe emes. Mindetti áleýmettik medıtsınalyq saqtandyrý júıesi – áleýmettik júıe, sáıkesinshe, azamattarǵa jınaqtalǵan jarnalary men aýdarymdardyń mólsherine qaramastan, medıtsınalyq qyzmet bárine birdeı kórsetiledi. Bul degenimiz, patsıentter MÁMS júıesinde medıtsınalyq qyzmetterge teńdeı qol jetkize alady degen sóz, ıaǵnı olarǵa tolyq kólemde medıtsınalyq kómek kórsetiledi.
10. MÁMS úshin artyq nemese qate eseptelgen qarajatty/jarnalardy/aıyppuldardy qalaı qaıtarýǵa bolady?
«Azamattarǵa arnalǵan úkimet» memlekettik korporatsııasynyń fılıalyna ótinish jazyp, tólemdi rastaıtyn qujattardy tirkeý qajet. Ótinishti qaraý 15 jumys kúninen aspaıdy. Tólem qandaı túrde júrgizilse, dál solaı qaıtarylady. MÁMS boıynsha sońǵy tólemniń somasy men kúnin egov.kz elektrondy úkimet portalyndaǵy jeke kabınette, Qoldau 24/7 mobıldi qosymshasynda, Telegram-daǵy @SaqtandyryBot arqyly tekserýge bolady.
Eske salaıyq, Medıtsınalyq saqtandyrý qoryna ótinishti kez kelgen keri baılanys arnasy - 1406 baılanys ortalyǵy, Qoldau 24/7 mobıldik qosymshasy, Telegram-bot @SaqtandyryBot jáne fms.kz resmı saıty arqyly qaldyrýǵa bolady.