Sheteldikterge 10 jylǵa vıza alý múmkindigin beretin zań jobasy jasalyp jatyr

ASTANA. QazAqparat – Qazaqstan ekonomıkasyna 300 myń AQSh dollarynan astam ınvestıtsııa salǵan sheteldik bıznesmenderge 10 jylǵa vıza alý múmkindigin beretin zań jobasy ázirlenip jatyr. Bul týraly Májilis depýtattarynyń saýalyna QR Premer-Mınıstriniń orynbasary – Saýda jáne ıntegratsııa mınıstri Serik Jumanǵarınniń jaýabynda aıtylǵan, dep habarlaıdy QazAqparat tilshisi.

«Qazaqstan Respýblıkasy Prezıdentiniń 2022 jylǵy 1 qyrkúıektegi Joldaýyna sáıkes osy kezeńde turýyna yqtııarhatty alý quqyǵymen Qazaqstan ekonomıkasyna 300 myń AQSh dollarynan astam ınvestıtsııa salǵan sheteldik bıznesmenderge 10 jylǵa vıza alý múmkindigin berýge baǵyttalǵan zań jobasyn ázirleý boıynsha jumys júrgizilýde», - dep atap ótedi Serik Jumanǵarın jaýabynda.

Bul rette onyń aıtýynsha, eń aldymen, jumys istep turǵan kásiporyndardyń negizgi kapıtalyna ınvestıtsııalar, qosylǵan quny joǵary ónimderdiń ónerkásiptik óndirisin qurý, jańa tehnologııalar jáne qyzmetter kórsetý, ıaǵnı Qazaqstan ekonomıkasy úshin mýltıplıkatıvti effekt beretin ınvestıtsııalar (salyq túsimderi túrindegi bıýdjetke qosymsha qarjylyq túsimder, jańa jumys oryndaryn qurý jáne taǵy basqalary) eskeriletin bolady.