Sheteldikterdi jumysqa shaqyrý erejesin buzǵan kompanııalarǵa 60 mln teńge aıyppul salyndy

ASTANA. QazAqparat – Oblys prokýrorlary memlekettik eńbek ınspektorlarymen birlesip, 30 adamnan kóp sheteldik jumys kúshin tartatyn 64 kásiporynǵa tekserý júrgizdi, dep habarlaıdy QazAqparat tilshisi.

Bul týraly QR Eńbek jáne halyqty áleýmettik qorǵaý mınıstrligi, Eńbek, áleýmettik qorǵaý komıtetiniń tóraǵasy Tólegen Ospanqulov aıtyp berdi.

«Nátıjesinde 1150 buzýshylyq anyqtaldy, onyń ishinde: 179 – eńbekaqy tóleýdegi teńsizdik; 399 – sheteldikterdiń ruqsatta kózdelmegen jumystardy oryndaýy; 210 – talaptardy saqtamaý bar. 205 sheteldiktiń bilimi olar atqaratyn laýazymdarǵa sáıkes kelmegen. Al 157 kásiporynda sheteldik jumys kúshin tartýǵa ruqsat bolmaǵan», - dedi T. Ospanqulov Ortalyq kommýnıkatsııalar qyzmetinde ótken baspasóz máslıhatynda.

Atalǵan buzýshylyqtardy joıý úshin 66 usynys engizilgen, 263 laýazymdy tulǵa ákimshilik jaýapqa tartyldy, 64,3 mln teńgege aıyppul salyndy, ákimdikter 390 ruqsatty qaıtaryp aldy.

«Eńbek zańnamasyn saqtaý máseleleri komıtettiń erekshe baqylaýynda. Bıylǵy 9 aıdyń qorytyndysy boıynsha memlekettik eńbek ınspektorlary 4 023 tekserý júrgizip, 6 825 buzýshylyqty anyqtady, onyń ishinde: eńbek salasynda – 4 573; eńbek qaýipsizdigi jáne eńbekti qorǵaý boıynsha – 2 103; halyqty jumyspen qamtý boıynsha – 149 buzýshylyq bar. Jumys berýshilerge 2 myńnan astam uıǵarym berildi jáne 318 mln teńgege 1 400-den astam ákimshilik aıyppul salyndy», - dedi T. Ospanqulov.