Sheteldikter qazaqstandyq jumysshylardan áldeqaıda kóp syıaqy alyp kelgen – Bas prokýratýra

NUR-SULTAN. QazAqparat – QR Bas prokýratýrasy 38 birlesken kásiporyndy tekserip, 6,5 mln teńge aıyppul salǵan. Bul týraly Ortalyq kommýnıkatsııalar qyzmetinde ótken brıfıngte qoǵamdyq múddeni qorǵaý qyzmetiniń bastyǵy Saparbek Nurpeıisov aıtty.

«Bul másele jıi kóterilip keledi. Onyń ishinde birikken kásiporyndarǵa baılanysty. Ótinishterdi tyńdasaq, bizdiń azamattardyń quqyǵy buzylyp, jalaqy kólemi shetel azamattarymen salystyrǵanda 2-2,5 ese tómen ekeni jıi aıtylady. Osyǵan baılanysty QR Eńbek jáne halyqty áleýmettik qorǵaý mınıstrligi Bas prokýratýraǵa usynys jasaǵan soń biz ony qoldadyq. 60-qa jýyq kásiporyndy belgilep aldyq. Búgingi kúni 38 kásiporynǵa qatysty tekserý aıaqtaldy. Sonyń nátıjesinde 460-tan astam eńbek zańdylyǵyn buzý faktilerin anyqtadyq. Onyń ishinde ruqsatqa sáıkes emes jumystardy atqarý boıynsha 150-ge tarta fakt anyqtaldy», - degen Bas prokýratýra ókili jumysshylaryn alalaıtyn kásiporyndarǵa toqtaldy.

«Almaty oblysynda «Sıtı Konstakshn» degen sheteldik kásiporyn bar. Ol jerde azamattarǵa jalaqydan bólek syıaqy beriledi. Shetel azamattary 750 myń teńge alatyn bolsa, bizdiń azamattar 2,5 ese tómen alyp kelgen. Biz mundaı jaǵdaılardy óte kóp anyqtadyq. Osyndaı jaǵdaı Aqtóbe oblysynda da anyqtaldy. «SınOpek Qazaqstan» JShS-nde syıaqy berer kezde shetel azamattary bizdiń azamattarmen salystyrǵanda 1,5-2 esege deıin kóp alyp kelgen. Eńbek ınspektsııasymen birge jumys júrgizip jatqandyqtan, bizdiń qoıǵan talap boıynsha 31 uıǵarym engizip, 60-qa jýyq ákimshilik quqyq buzý isteri qaraldy. Eskertý alǵandar bar. Onyń ústine 34 aıyppul salyndy. Onyń jalpy somasy - 6,5 mln teńge», - dedi Saparbek Nurpeıisov.