Sheteldikter Qazaqstan spýtnıkteriniń qyzmetine júgine bastady
QR Parlamenti Senaty Halyqaralyq qatynastar, qorǵanys jáne qaýipsizdik komıtetiniń músheleri Astananyń irgesinde turǵyzylyp jatqan Ulttyq ǵarysh ortalyǵynda bolyp, atqarylyp jatqan jumystarmen tanysty. Komıtet músheleri ortalyqta tájirıbelik óndirisi bar ǵaryshtyq tehnıkany Arnaıy qurastyrýshylyq-tehnologııalyq bıýrosynyń jumysyn tekserdi.
Senatorlarǵa ortalyqtyń jumysyn baıan etken QR Qorǵanys jáne aeroǵarysh ónerkásibi mınıstri Beıbit Atamqulov sońǵy jyldary Qazaqstannyń ǵarysh spýtnıkterine ár túrli memleketter qyzyǵýshylyq tanytyp jatqanyn atap ótti.
«Bul 750 shaqyrymnan túsirilgen keskin, - dedi Beıbit Atamqulov. - Osy keskindi túsirip turǵan eki spýtnık halyq sharýashylyǵynda da, ulttyq qaýipsizdik baǵytynda da qoldanylady. Biz osy spýtnıkter arqyly 28 mıllıon gektar aýmaqtyń keskinin memlekettik organdarǵa qaıtarymsyz berip otyrmyz.
Mınıstrdiń sózine qaraǵanda, kórshiles eldermen atalǵan baǵytta baılanys nyǵaıa túsken. Qyrǵyzstan, Ózbekstan, Tájikstan, Túrkimenstan, Aýǵanstan elderine búgingi tańda qazaqstandyq spýtnıkten túsiriletin keskinder usynylyp otyr.
«Osy elderdiń ishinde Aýǵanstan bizdiń spýtnıkterge erekshe qyzyǵýshylyǵyn bildirýde. Kórshilerdiń ishinde Túrkimenstan bizdiń spýtnıkterdiń keskinine tapsyrys berdi. Qazaqstandyq Ultttyq ǵarysh ortalyǵy Airbus kompanııasymen birge konkýrsqa qatysýdy kózdeýdemiz. Ózbekstanda telekommýnıkatsııalyq spýtnık joq. Biz olarǵa baılanys qyzmetin usyndyq. Aýǵanstanmen birlese jumys atqarý boıynsha úlken úmit bar», - deıdi mınıstr.
Spýtnıkter tobyndaǵy eldermen jumystar qarqyndy júrip jatyr. Bul baǵytta BAÁ, Kanada, Japonııa, Ońtústik Koreıa, Qytaı elderi bizge qyzyǵyp otyr.
«Jýyqta men Frantsııanyń Syrtqy ister mınıstrligi men Qorǵanys mınıstrliginiń ókilderimen kezdesip, spýtnıkterdi qoldanýǵa ruqsat aldyq. Demek, Eýropa boıynsha áskerı nysandardan basqa shekteý sharalary alynyp tastaldy. Chılı jáne Perýmen jumys atqarmaqpyz, sebebi olardyń da bizdiń spýtnıkterdiń keskinine qyzyǵýshylyǵy zor», - deıdi Atamqulov.