Sheteldik jýrnalıster Qazaqstan mádenıetimen tanysty

ASTANA. QazAqparat - Qazirgi zamanǵy qazaqstandyq mádenıettiń jetistikterimen tanysý úshin Qazaqstanǵa sheteldik jýrnalıster toby keldi. Syrtqy ister mınıstrligi men Mádenıet jáne sport mınıstrligimen birlesip uıymdastyrǵan aptalyq baspasóz týry barysynda jýrnalıster Astana, Almaty, Shymkent pen Túrkistanǵa baryp keldi. Bul týraly SІM baspasóz qyzmeti habarlaıdy.

Týrǵa mádenıet jáne óner salasynda mamandanǵan Avstralııa, Avstrııa, Brazılııa, Ulybrıtanııa, Ispanııa, Italııa, Kanada, Mysyr, Serbııa, AQSh, Frantsııa, Ońtústik Afrıka Respýblıkasy jáne Japonııanyń jıyrmadan astam tilshileri men blogerleri qatysýda.

Baspasóz týrynyń qatysýshylarmen kezdesý barysynda Syrtqy ister mınıstri Qaırat Ábdirahmanov túsindirgendeı, Qazaqstan qazirgi qazaqstandyq mádenıetti shetelde tıimdi jyljytýyn qamtıtyn Memleket basshysy Nursultan Nazarbaevtyń «Rýhanı jańǵyrý» aýqymdy baǵdarlamasyn iske asyrýǵa kiristi. Baspasóz týry kelgen jýrnalısterge Qazaqstandaǵy mádenı ártúrlilik pen áleýettiń keń kórinisin qalyptastyrýǵa kómektesedi.

Astanada tilshilerge Ulttyq mýzeı men EKSPO-2017 qazaqstandyq pavılonynyń ekspozıtsııalary usynyldy. Ulttyq akademııalyq kitaphanasynda baspasóz týry qatysýshylarynyń aldynda Úmithan Munalbaeva, Tursyn Jurtbaı, Bolat Kómekov, Álimjan Baıanǵalı, Turjan Ońaıgúl jáne Ulyqbek Esdáýlet sııaqty qazaqstandyq ádibıettanýshylar men ǵalymdar sóz sóılegen. Professor Ádil Ahmetovpen, sondaı-aq jebeýshi jáne saıahatshy Sapar Ysqaqovpen kezdesýler ótti. «Astana-Opera» teatrynda sheteldik tilshiler «Karmen» operasynyń premerasyn tamashalady.

Ońtústik Qazaqstan oblysy ákimdigimen birlesip, baspasóz týrynyń qatysýshylaryna Otyrar kóne shahary, Qoja Ahmet ıAssaýı men Arystanbab kesenelerine, sondaı-aq Áziret Sultan Memlekettik tarıhı-mádenı murajaı-qoryǵyna saparlary uıymdastyryldy.

Almatyǵa sapar baǵdarlamasy Almaty qalalyq ákimshiliginiń qoldaýymen ázirlenip, oǵan kórkemsýret murajaıy, Á.Qasteev atyndaǵy Óner murajaıy, Almaty murajaıy, «Transforma» teatr alańy, «Esentai Gallery» óner galereıasy, Dástúrli mýzykanyń mýltımedıa ortalyǵy, «Qazaq-Oner» qolóner ortalyǵy, jas qazaq aqyndarymen kezdesý, basqa da is-sharalar kiredi.

Syrtqy ister mınıstrligi Qazaqstandaǵy saıası jáne ekonomıkalyq oqıǵalardy jarııalaý úshin sheteldik tilshilerdiń baspasóz týrlaryn turaqty túrde uıymdastyryp otyrady. Sonymen qatar, «Jahandyq álemdegi qazirgi qazaqstandyq mádenıet» jobasy sheńberinde ótip jatqan bul birinshi baspasóz týry týrızmdi damytýǵa jáne jalpy Qazaqstannyń damyp kele jatqan memleket retindegi oń ımıdjin qalyptastypýǵa atsalysady.